رأيي في علاء الأسواني صاحب قصة عمارة يعقوبيان

عــمـــــــارة يــعــقــوبـيـــــان - فــي 34 شــارع طـلــعــت حـــــرب

بالأمس وأثناء متابعتي لمدونة بنت جميلة وعاقلة وبحترم كتاباتها جدا وهي الآنسة بنوتة صاحبة مدونة ورقة وقلم

وجدت موضوع جميل عرضته بعنوان وزيرة خارجية إسرائيل ...خدامة

الموضوع جميل فعلا وبيشير إلى خسة وقذارة الصهاينة

هو كان مقال لعلاء الأسواني ونقلت لينا بنوتة ثلاث فقرات منه أثاروا انتباههاا

للأٍسف لم أعلق على جوهر موضوعها بسبب استفزازي من علاء الأسواني في فقرتين كتبهم داخل المقال

وده خلاني أربط بين ماكتبه وبين موضوعي السابق الرأي والرأي الآخر

أنا مش من حقي أنفعل على صاحب الرأي إلا زي ماقلت ليكم لو كان لا يتحدث بالعقل والمنطق أو لو كان في كتاباته يتعرض لبلدي

الكتابة التي تهدف إلى التجريح فقط أنا ضدها جدا وهذا ما فعله ويفعله علاء

الجملة التي استفزتني سوف أعرضها عليكم من واقع الفقرة التي وردت فيها

ثانبا: أن قدرة اسرائيل المعنوية على ارتكاب أبشع المجازر غير مسبوقة في التاريخ

باستثناء جرائم النازيين التى تستوحى اسرائيل الكثير من

فقد وقف قادة اسرائيل يتحدثون بطريقة عادية ويبتسمون في المحافل الدولية بينما تقوم طائرتهم في نفس اللحظة بالقاء القنابل على الاطفال والنساء في غزة

ولم يحس قائد صهيونى واحد بالذنب أو الاسف أو الندم...

بل ان وزيرة خارجية اسرائيل "صديقة الوزير أبو الغيط العزيز الذى أنحنى مسرعا ليمسك بيدها لئلا تتعثر

قدمها الكريمة على السلم

ليست الا كادرا كبيرا من المخابرات الاسرائيلية

وقد اعترفت للصحافة الغربية بأنها تنكرت وعملت خادمة في بيت عالم ذرة عراقي في باريس لفترة

حتى أكتسبت ثقته وتمكنت من دس السم في طعامه وقتله ... وهذه هى اسرائيل

اتفاجئت بالجملة الإعتراضية السخيفة اللي مالهاش لازمة خالص في الموضوع

"صديقة الوزير أبو الغيط العزيز الذى أنحنى مسرعا ليمسك بيدها لئلا تتعثر قدمها الكريمة على السلم"

وكان ده ردي على الموضوع بكامله

السلام عليكم

استنادا لموضوعي عن الرأي والرأي الآخر هرد على مقالك الذي اخترتيه يا بنوتة

وطبعا من وجهة نظري وما أنا مقتنعة به تمام الإقتناع

أولا : أنا ليا مآخذ على علاء الأسواني ده من وقت عرض فيلم عمارة يعقوبيان اللي اتفاجئت بكم الفضايح اللي كاتبها

فيها ومصور مصر على إنها بيت دعارة وشذوذ

مصر فيها ناس منحرفين أخلاقيا نتفق على ذلك لكن مش كلهم مصر

وفي بداية فيلمه كان بيشير لجمال مصر وقت ماكان الإحتلال فيها واليهود فيها ومقدم الفكرة بشكل خبيث

برجاء مراجعة مقدمة الفيلم مرة أخرى

لم أحترمه نهائي لذلك لن أستطيع أن أتفق معه في هذا المقال في معظم مايقوله لأني أشعر من كتاباته أنه ضد مصر وليس معها

ثانيا: المشاهد التي حدثت في غزة ليست أحداثا جديدة غريبة فلقد حدث قبلها في مصر ولبنان والعراق والبوسنة والهرسك وغيرهم

وسوف تحدث مرات أخرى لسبب بسيط وهو أن الخير والشر باقيين إلى يوم القيامة

ماحدث في غزة رغم بشاعته طبعا أخذ حيزا إعلاميا كبيرا جدا رغم أن نفس المشاهد حدثت في لبنان وبنفس عدد القتلى ومرار وتكرارا ولم تستمر البروباجنده الإعلامية كل هذا الوقت

كل هذا الغليان هو ماتسعى له إيران وتريد أن تظل نيرانه متأججه للنيل من مصـر

وللأسف هناك من داخل مصر من يضرموا هذه النار ويزيدوها اشتعالا عن جهل وعن حمق

ثالثا:مما يزيد من عدم احترامي لعلاء الأسواني جملته عن وزير الخارجية المصري السيد / أحمد أبو الغيط

إيه معنى إنه يقول عن وزيرة خارجيةإسرائيل"صديقة الوزير أبو الغيط العزيز الذى أنحنى مسرعا ليمسك بيدها لئلا تتعثر قدمها الكريمة على السلم"

جملة مقرفة جدا وغير مهذبة وده اللي أنا اتكلمت عنه قبل كده الإختلاف في الرأي بيخللي الناس البيئة اللي دون المستوى تنهش فيمن هم على اختلاف في الرأي معهم

مين قال لعلاء الأسواني إن تسيفي ليفني صديقة أحمد أبو الغيط؟

إيه هو شكل الصداقه ده اللي بيشير ليه؟

بيعزمها في بيته مثلا وبيتفسح معاها هو وأسرته

بيسافر رحلات سياحية لإسرائيل وبينزل في ضيافتها وسط أسرتها

بيتصلوا ببعض كل شوية وبيحكيلها عن مشاكله ومنغصات حياته؟

بجد الجملة استفزتني جدا

إن يكون فيه علاقة إحترام بينهم لأنهم على نفس القوة في المنصب ولأنه بيمثل بلده كوزير خارجية يجب أن يحسن التصرف مش معناها إنها صديقته

وبعدين صدقيني يا بنوته لو علاء الأسواني كان مكانه والست بتتكعبل على السلم كان هيسندها

ولو أنا أو انتي كنا هنسندها دي تصرفات تلقائية فطرية بنعملها بدون تفكير

اتربينا عليها وعادي يعني انه يساعدها بدل ماتقع

لكن أصحاب النفوس المريضة والعقول المظلمة التي تهوى التجريح للتجريح فقط ينظروا إلى المواقف من منظور مختلف ومتخلف في آن واحد

زي ماعلقوا عليه لما كان بيتثائب في اجتماع القمه العربية بالكويت

راجل مانامش لمدة 36 ساعة حرام إنه يتثاءب؟

يعني هل التصرف ده بيجرده من عروبته ووطنيته ودينه وأخلاقه؟

ليه يعلقوا على حاجه زي دي؟

ده تصرف آدمي طبيعي وبعدين هو ماكانش بيتثاءب وبيخرف في الكلام ونايم على روحه أو ضارب مخدرات

كل جريمته إنه ناقص نوم لأنه بيشتغل وطالع عينه علشان الفلسطينيين

وبالظبط زي لما هاجموا شيخ الأزهر وقالوا سلم على بيريز

يا جماعه هو ماسافرش اسرائيل يقدم فروض الطاعه

هو لقى راجل بيمد إيده ليه فجأة واضطر انه يسلم

ماراحش يدور عليه وسلم عليه والتاني في مكانه ده العكس هو اللي حصل

برضه تصرف عادي وأي انسان مكانه كان هيتصرف زيه

تعرفي أنا مثلا برفض السلام بالإيد على الرجال لكن أوقات ممكن أكون في موقف وتلقائي ألاقي نفسي سلمت

هل معنى كده إني شخصية مهزوزة ومش ملتزمة؟أو أقصد معنى خبيث من وراء السلام؟أكيد لأ

لكن برضه النفوس المريضه هاجمت الراجل بشكل بشع ومقزز

وأعيد وأكرر لو كان حد فيهم مكانه كان اتصرف زيه بالظبط وسلم على الراجل

اللي مش قادرين يفهموه الناس دي إننا بنتعامل مع اسرائيل بشكل ديبلوماسي محض

وفي نفس الوقت مش مطولينهم أمل التقرب مننا

الرئيس حسني مبارك مش بيروح عندهم

الشعب المصري رافض التطبيع معاهم على كافة المستويات

الرئيس بيوجه ليهم كلامه بشكل حاد جدا لو حاولوا يقربوا من أمن

يعني الموضوع مش صداقه بين الحكومة واسرائيل ولا حاجه

رابعا : الجملة الأخيرة اللي قايلها فيها تنويه عن إنه رافض للرئيس حسني مبارك

مش عارفه الراجل ده مش مفهوم ليه بالنسبة لبعض المصريين؟

وأنا بقول بعض لأن كل اللي بيهللوا وبيستخدموا حنجرتهم كتير عددهم قليل

بس بيبانوا كتير علشان الأضواء بتتركز عليهم لصالح طبعا دول أخرى ضد مصر

مافيش إنسان في الدنيا خالي من العيوب ومافيش رئيس دولة صح 100 % وليس له أخطاء

ومش عيب إنه يخطىء لكن العيب إننا مانشوفش غير السلبيات فقط ونترك الإيجابيات

لابد أن يكون الحكم عادل ومنطقي ومبني على حقائق موجودة فعلا على أرض الواقع

مصر تقدمت كثيرا في عهد مبارك وارتقت وحققت انجازات

سياستنا الخارجية وعلاقاتنا بكل الدول راقية ومحترمة ولنا ثقلنا في المجتمع الدولي

أمننا يحيط به رجال يفخر أي مصري أنهم رجال أمنه والمسئولين عن سلامته

ياريت يا بنوته تشوفي الــ 13 جزء الخاصين بحديث وزير الخارجية المصري في اليو تيوب

لعلمك ناس كتير اتصلوا بالقاهرة اليوم وطلبوا الاعادة لأن فعلا الحديث رائع وهيرد على تساؤلات كتير ممكن تكون

جواكي ومشوهة شكل حكومة بلدك قدامك

خالص مودتي و تحياتي...

بس حبيبتي بنوتة فهمت اني بهاجمها هي لشخصها

وفهمتني انها لا تتفق اتفاق كامل على علاء الأسواني وليها مآخذ عليه

رديت تاني لتوضيح موقفي وكان هذا ردي:

ــــــــــــــــــــــــــــــــــــــــــــــــــــــــــــــــــــــــ
وعليكم السلام

بصي يابنوتة

ارجعي لردي مرة أخرى وهتشوفي إن كلامي كله موجه لعلاء الأسواني مش ليكي

أيوه علاء الأسواني متبني خط الهجوم على الحكومة المصرية بل وعلى مصر

انتي بتقولي ماشفتيش الفيلم وانا مشكلتي مش مشاهد مخله بالآداب في الفيلم

أنا بتكلم عن القصة نفسها المخرج مهما عمل مش هيحط أفكار من عنده هو بيصيغ القصة بالشكل اللي يصلح للعرض السينمائي في حدود توجهات الكاتب

جوهر القصة أصلا مسيء جدا لبلدك حبيبتك مصر ولشعبها

أنا شفت الفيلم في السينما وكان على نفس الصف اللي قاعده فيه اسر خليجية وكنت في منتهى الاستياء من تعليقاتهم على قصة هذا الكاتب الغير محترم زي ماقلتلك إن ده رأيي فيه

انتي ممكن في بيتك تحصل مشاكل مع والدك ووالدتك واخواتك لكن ماينفعش تروحي تحكيها للناس وتضخميها وتخللي

سيرتك انتي واسرتك ماده للحديث

أسرتك الصغيرة زي اسرتك الكبيرة اللي هي اهل بلدك

ماينفعش ييجي كاتب بيستخبى ورا بارافان الحرية وقول الحق ونلاقيه بيقول حق يراد به باطل

أنا كلامي بيكون محدد جدا لذلك انا رديت على السلبيات اللي في المقال لأن هي دي اللي تعنيني

قذارة وإجرام اسرائيل مفروغ منهم

لكن القذارة لما تيجي من كاتب مصري هي دي اللي تفرق معايا

هو بيتكلم في موضوع معين واصفا إجرام إسرائيل يبقى إيه اللي يخليه يتناول موقف إن وزير خارجية مصر سند وزيرة خارجية اسرائيل احسن تقع وإنها صديقته

انتي اتفاجئتي اني ماعلقتش على النقاط الرئيسية بالموضوع

طيب ماهو ده سبب أدعى بيعزز كلامي

واحد بيتناول موضوع معين عن الصهاينه يجيب سيرة وزير خارجية بلده بالسوء ليه؟

وبعدين بالنسبة للمقارنة بين عهدي الرئيسين السادات ومبارك لا تصلح المقارنه فلكل منهم زمنه وظروفه

وزي ماقلت كل رئيس ليه حسناته وسيئاته

بس أنا بالنسبة ليا بقول التلاته مش الاتنين يعني الرؤساء جمال عبد الناصر ومحمد أنور السادات رحمة الله

والرئيس محمد حسني مبارك ربنا يطول في

كل واحد فيهم ليه جماله وليه انجازاته وليه كبواته

وكلامي اللي ياريت تراجعيه تاني يا بنوته ان لازم لما نحكم يكون حكمنا عادل بمعنى نذكر الايجابيات والسلبيات

مش نشوه رموزنا وخلاص زي اللي بيعمله علاء الأسواني هو وأمثاله

ماتكلمتش عن النقاط الثلاث الرئيسية في المقال لان الجمل الاعتراضية للكاتب الغير محترم علاء الأسواني شوهت مقاله

وخربت المعنى المطلوب منه

انتي مافيش هجوم مني عليكي خالص يا بنوته انتي قريتي مقال وعجبتك مقتطفات منه ونقلتيها

أنا بهاجم علاء الأسواني بس هجوم محترم وفي حدود الآداب العامة

خالص مودتي و...تــحــيــاتــي
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

طبعا علاء الأسواني حر في إنه يقول وجهة نظره لكن مش صح إننا نجرح في بعض علشان نقول رأينا

أنا لما قلت عليه غير محترم أنا أعنيها لأنه شوه بلدي وشوه أهلها

خللى البنات الغلابه اللي بيجروا على أكل عيشهم وبيشتغلوا بائعات في المحلات متهتكات داعرات بعشره جنيه مع أصحاب المحلات

وخللى البلد فيها شذوذ الناس عارفين اصحابه وبيتعاملوا معاهم عادي

وخللى مصر زمان أيام الإحتلال ووجود اليهود أحسن وأنضف من دلوقتي وإن اللي وسخوها هما ظباط الثورة اللي هما

أصلا حرروها وخللوا واحد زيه يعيش في أمان وييجي عليه يوم ويهتك في عرض بلده وأهلها

لذلك قلت عليه غير محترم ولازلت عند رأيي

آسفه إني طولت عليكم لكن الموضوع أخد من تفكيري كتير وحبيت أنقله ليكم على المدونة لتشاركوني ما بداخل عقلي

تحياتي لبنوته ولكم

الــرأي ..والــرأي الآخــــــــــر

الموضوع ده جدير بالتأمل فعلا

بطبيعة تكويني الشخصي بكون في حالة تأمل مستمرة لما يحدث من حولي

عندما يتحدث أمامي الأشخاص أتعامل مع أحاديثهم برؤية المشاهد وليس المستمع فقط

أتناول كلماتهم وتعابير وجوههم ودرجة ارتفاع نبرة الصوت

وأتعجب كثيرا

كل إنسان يعتبر أن رأيه هو الأصح والجدير بالإهتمام

الأحاديث بين الناس تتحول في معظم الأحيان إلى حروب كلامية

تنتابني حالة من القرف مصحوبة بالضحك على أساس أن فيه هم بيضحك

بشوف ناس بتتكلم كلها في وقت واحد

منتهى الغوغاء والهمجية

منتشرين جدا في برامج التوك شــو

طيب إيه المانع كل إنسان يعرض وجهة نظره بطريقة هادية والطرف الآخر يرد عليها بطريقة راقية ومحترمة

قد نختلف في الرأي لكن مش معنى كده إننا ننهش بعض

الأزواق لا تناقش لكن الأفكار تناقش

لماذا تتحول مناقشاتنا إلى معارك ولا نراعي حتى عندما تكون هذه المناقشات على شاشات التليفزيونات؟

لماذا لا نتفهم أن كل إنسان له الحق في تكوين وجهة نظر حيال موضوع ما وأنه ليس من حق الآخرين معاقبته على توجهه هذا؟

لماذا لا نتناقش مناقشات موضوعية على أسس وقواعد أكاديمية تصل بنا إلى تكوين رأي موحد يتفق عليه الجميع لو كنا نتناقش حيال قضية حيوية ما؟

يحتاج الأمر منا إلى تدريب للذات فلماذا لا نبدأ بأنفسنا ونطور من شخصياتنا وأفكارنا؟

السؤال الذي يفرض نفسه حيال هذا الموضوع هو :

هل وصل بنا الحال إلى أننا لا نستطيع التعامل بهدوء وضبط أعصاب إلى هذه الدرجة ؟

لماذا لا نعرض وجهات نظرنا المعارضة بأسلوب مهذب وعلمي وقائم على أساس طبعا لأن من الخطأ تبني وجهة نظر بعيدة عن المنطق والعقل

أنا كلامي السابق كله عن وجهات النظر السليمة المنطقية

طيب عندي مثال واضح جدا بالنسبة ليا

في موضوعي السابق بهذه المدونة تحدثت عن رأيي في وزير الخارجية المصري وتناولت بالتحليل البسيط موضوع غزة وكتبت رأيي في حكومة بلدي

لاحظت ملاحظة لطيفة خالص

دخل الموضوع عدد لا بأس بيه ولكن الغريب أني لم اتلقى أي تعليق من أي واحدة منهم

وفيهم صديقات ليا وأنا على علم بأنهم مختلفين معي

لكن إيه اللي منعهم من الكتابة لتوضيح وجهة نظرهم الشخصية؟

حتى لو مخالفة لفكرتي ايه المشكلة إن وجهات النظر المختلفة تتكتب وتتناقش؟

وده اللي خلاني أسأل سؤال : هو احنا مابقيناش عارفين ازاي نتناقش ونختلف؟

يعني لا عارفين نتفق ولا عارفين نختلف؟

دي كارثة

يعني القصة مش قصة إن زعماء الدول العربية مش عارفين يتحدوا ويتفقوا

ده الفايروس واصل لينا احنا كمان

أرجو إن وجهة نظري تكون وصلت ليكم

وفي انتظار مناقشاتكم الجادة

خالص مودتي حتى لو اختلفنا في الآراء

و....تــحـيــاتـــي

تــحــيــة تقدير واحترام لوزير خارجية مـصـــر

على هامش الموضوع:

ــــــــــــــــــــــــــــــــــــــ

منظومة الحكمة في بلدي تعمل في هارموني متجانس ومتكامل وقوي وتتمثل في

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الرئيس / محمد حسني مبارك

اللواء / عــمــــر سليـمــــــان

السيد / أحـمــد أبــوالغــــيــط

دي وجهة نظري لأن السياسة الخارجية عبء ثقيل

وسياستنا الخارجية ناجحة وراقية

تعتمد على منهج معين يضعه رئيس الدولة إستنادا للعمل المنظم للأمن القومي متمثلا في المخابرات العامة المصرية

ويتم نقل هذا المنهج وعرضه على العالم من خلال قنوات ديبلوماسية تتبلور وتتمثل في وزير الخارجية

لذلك كونت هذا المثلث وأطلقت عليه مــثـلــث الــحــكـــمــة

ـــــــــــــــــــــــــــــــــــــــــــــــــــــــ

أدخل بقى في الموضوع

الحكمة المعروفة تقول

ــــــــــــــــــــــــــــــــ

تـكــــــــلـم ...حــتـى أراك

وشعرت قوي بيها وبصدقها عندما استمعت وشاهدت حديث الإعلامي عمرو أديب في برنامج القاهرة اليوم مع السيد / أحمد أبو الغيط وزير الخارجية المصري

أنا أصلا بعيدة عن السياسة وبشعر بالصداع إذا توغلت في أي موضوع عنها

لكن موضوع غزة في الفترة السابقة فرض نفسه على الساحة وجعلنا جميعا وعن دون قصد نتكلم حوله ونحلل ونعلق

عندما تابعت حديث السيد أحمد أبو الغيط شعرت بسعاده بالغة لأسباب كتيرة جدا فمنذ بدء هذه المذبحه الغير آدميه على أهلنا في غزة تم تصويب العديد من الأسلحة الكلامية الهجومية على بلدي وعلى رئيسها وشعبها

وأنا واحده من الناس الحقيقة أذوب عشقا وحبا في بلدي

وأشعر بغضب عارم حاد جدا إذا تم تناولها بطريقة غير لائقة

مصــر بلدي كيان كبير وعظيم جدا على خريطة العالم

عظيمة بشعبها وبتاريخها وبتقاليدها ومثلها العليا

" خير أجناد الأرض هم المصريين"

" ادخلوا مصر إن شاء الله سالمين"

ورسولي عليه الصلاة والسلام قال: " أوصيكم بأهل مصر خيرا فإن فيها أنسباؤنا وأصهارنا"

قيمة مصر معروفة

واللي مش عارف حاسس

واللي مش عارف ولا حاسس

أو عارف وبيحقد عليها وعلى شعبها لهذه المكانة......... يولع بجاز

الكثير من الناس هاجم مصر ووصفها بالخيانه والعماله لصالح أمريكا والصهاينة

الكلام كان يحمل الكثير من الحمق والغباء

يردده ببغاوات أغلبهم من الشباب صغير السن الذي يفكر بعواطفه وبالتالي من الممكن السيطرة عليه

وطبعا كان هناك أيضا من يسمون أنفسهم أخوان مسلمين وأنا أصلا مش عارفه يعني هو اللي غيرهم يبقوا مش مسلمين؟

رتبت بداخلي فكره معينه عن ما يحدث وكانت كلها تتركز حول خطه شيطانية يقوم بها أنجاس إيران للسيطرة على

الشرق الأوسط مستخدمين حلفائهم ممن هم على شاكلة حماس في فلسطين وحزب الله في لبنان والمطبلاتيه بتوعهم من

الأخوان المسلمين في مصر وغيرها من الدول

وطبعا وللأسف معاهم الناس اللي بتتكلم بدون تفكير وبيكون المحرك ليها هو المحرك العاطفي فقط

وكلنا عارفين إن الإنسان لا يجب أن يفكر ويصدر قراراته بناءا على توجهه العاطفي

حتى في أمر الزواج تلاقي الناس يقولوا لا يا بنتي حكمي عقلك وبلاش تمشي ورا قلبك

فما بالكم بمصير أمه ؟ ليه عايزين نقرره تبعا للأهواء؟

اكمل لكم بأن هذه كانت فكرتي وكنت حانقة جدا على مافعله أشاوسة حماس وعندي دفوعاتي عن رأيي

المفروض إن الجهاد في سبيل الله زي ما بيتشدقوا وبينادوا بيه يكون على أسس

بمعنى ماينفعش نقول يللا بينا نهجم على عدو إلا إذا كنا نملك القدره على مواجهته

والقدرة طبعا سوف تتمثل في العدد والعتاد

ـــــــــــــــــــ

العدد = الجنود المقاتلين

العتاد = السلاح القوي الكافي للمواجهة

وبدون توفر العدد والعتاد يبقى المعادلة غير متوازنة ولا نستطيع البدء

لأن من أهم الأشياء برضه لما تكون عايز تهاجم عدوك إنك تتعرف على قوته ولا تتجاهل هذه القوة وتنقص من شأنها

ده يبقى سفه وغباء وحمق

خير دليل على ذلك ماحدث معنا من بعد حرب 1967

لم نسارع في الهجوم مرة تانية وإنما أعدنا ترتيب جيشنا وأعدنا تنظيم صفوفنا وبحثنا عن الثغرات التي أوقعتنا في

الهزيمة في 67 وجهزنا الجيش بالأسلحه الكافية القوية

كنا إيد واحده ملتفين كلنا حول رجل واحد هو زعيمنا الراحل الرئيس محمد أنور السادات عليه رحمة الله

مش ميليشيات مختلفه ومتناحره ومتطاحنه وبيقتلوا في بعض زي ماشفنا وبنشوف بين حماس وفتح

الحرب مش لعبة واستعادة الكرامة المسلوبة ليها أصول وإلا سوف يضاف إلى الهزيمة هزائم متتالية ومستمرة وتزداد الكوارث والخاسر الوحيد هو الشعب الذي ابتلاه ربه بأسافل الناس يحكموه ويتحكموا في مقدراته -وأقصد هنا-الفلسطينيين كشعب مغلوب على أمره وحماس الذين هم أسافل الناس المتحكمين فيه

وبالرجوع إلى دستورنا وقانوننا الإلهي العظيم نجد رب العزة سبحانه وتعالى يقول في محكم كتابه الكريم

"وأعدوا لهم مااستطعتم من قوة ومن رباط الخيل ترهبون به عدو الله وعدوكم "

اللي هو العدد والعتاد اللي اتكلمنا عنهم طيب ايه مش بيطبقوا كلام ربنا ويعملوا بيه - مش هما مجاهدين برضه وعارفين ربنا؟

واللي حصل من حسن نصر الله في لبنان من وقت قريب لا يختلف عن ماحدث من حماس في غزة

نفس السيناريو يتكرر بنفس الحماقة بنفس الغباء وبنفس المذابح التي نراها في المشاهد البشعه التي تعرض علينا صباحا مساءا

مذبحة في لبنان لأن حزب الله استفز الصهاينة ولم يتسبب في خسائر فادحه عندهم :

لكن الكلاب دول بيتلككوا وبيتسلبطوا هجموا على اللبنانيين وقتلوا منهم عدد يقترب من 1500 انسان ده غير اللي اصيبوا بإعاقات وعاهات

وأيضا نفس السيناريو في غزة صواريخ متتاليه عليهم لم تتسبب في كوارث أعقبتها مذبحه بشريه مهوله للغزاويين

طيب ايه النتيجه اللي كان متخيلها حسن نصر الله او حماس؟

كانوا فاكرين هيوصلوا لإيه يعني؟

إباده للصهاينه؟

طيب بناءا على إيه؟

تفاوت ملحوظ جدا في القوى وفي الأسلحة ممكن يؤدي إلى إيه؟

طبعا نتيجته واضحه ومفهومه عدد يقترب من 1500 قتيل فلسطيني وحوالي 5000 معاق وعاجز

حسبهم الله ونعم الوكيل

حماس وفتح مش بيتناحروا لاستعادة بيت المقدس إنما بيتناحروا حول السلطة ولذلك لن ينصرهم الله لأن النية غير

شريفة

لا بد أن تكون الغاية شريفة ووسيلة الوصول لهذه الغاية أشرف

مش تناحر على سلطه وطمع في ماليس من حقهم وتعريض أبرياء للقتل والتعذيب والتشريد بلا رحمة

كده الحكاية كلها بقى لها تقييم تاني خالص بعيدا عن الجهاد والكلمات الكبيرة الكاذبة دي

الشيء المقرف بقى إن بعد ده كله بيهاجموا مصر ويحملوها الذنب ويقولوا دم اللي اتقتلوا في رقبتها

كسر رقبتهم كلهم وقطع ألسنتهم التي لا تنطق بالحق

في حديث وزير الخارجيه المصري يوم الإثنين وإعادته يوم الثلاثاء صباحا

استمعت إلى حوار عقلاني جريء قوي بالحق والمنطق

استمتعت بمعرفة ماكانت بلدي تقوم به لإنقاذ أهل غزة

تشرفت بالقوة التي تحدثت بها مصر إلى المجتمع الدولي سواء عربي أو غربي

طالت هامتي وزاد كبريائي كمصرية أعشق تراب هذا الوطن عندما استمعت للأحاديث التي دارت بيننا وبين الصهاينة

حول مصر وسلامة وأمن مصر القومي والتحذير من المساس به

فرحت بنفسي قوي لما لقيت استنتاجاتي وتحليلي لما يحدث متطابقة مع الصورة المتضحه أمام المسئولين في بلدي وهي
ــــــــــــــــــ

المخطط الإيراني المتعفن

ـــــــــــــــــــــــــــــــــــــــــ

تفاجأت وأصبت بصدمة شديدة عندما علمت أن إيران يدعموا حماس شهريا بمبلغ يتراوح من 25 - 40 مليون دولار

مرتبات وأسلحة وخلافه للعصابه التي تسمي نفسها حماس حتى يقوموا بتنفيذ خطة إيران في الوطن العربي حتى تسود وتسيطر

أحسست بالأمان إن في بلدي سلطة وجنود كالأسود قادرين على حماية بلدي وحمايتي أنا وباقي المصريين

وزير الخارجيه المصري ديبلوماسي جريء متحكم في قدراته التي وهبها الله له ويستخدمها بمنتهى الدقه والذكاء

تحيه لمن أعطاه هذا المنصب ووضع الرجل المناسب في المكان المناسب

احترمت الرئيس محمد حسني مبارك أكثر من الأول وزادت قناعتي أن هذا الرجل المتبقي من الزمن الجميل حصن منيع لمصر وحائط قوي نستند عليه ومن لا يعرف قيمته هم الحمقى الخاوية عقولهم

ومن مصرية الهوية والهوى أقول

ــــــــــــــــــــــــــــــــــــــــــــــــــ

حفظك الله يا مصر وحفظ لكي رجالك ورجال أمنك من كل شر

أرجوكم استمعوا إلى حديث عمرو أديب في برنامج القاهره اليوم مع وزير خارجية مصر

موجود في 13 جزء على

www.youtube.com

فقط اكتبوا في البحث داخل هذا الموقع : حديث عمرو أديب مع وزير خارجية مصر

خالص مودتي لمن يتفق معي حول مقالي وآرائي

ودعائي بالهداية لمن يختلف

تـــحـــيـــاتـــــي

صحفيــــة المستقـــبل قادمـــة...ادعولي يا بنـــات

السلام عليكم ورحمة الله تعالى وبركاته

أخواتي الحبيبات

لقد جمعت شتات نفسي وعزمت على البدء في التدوين بنفسي من بنات أفكاري

هو طبعا المفروض في التدوين إنه يكون نقل لما يدور بداخلنا إلى المدونة لأن هذه المدونات هي المرايا التي تعكس ما بداخل أصحابها وتقدمهم لمن حولهم بمنتهى الشفافية

في الفترة الماضية كنت في حالة تدريب ذاتي لنفسي على خوض هذه التجربة الأدبية

قمت بإنشاء العديد من المدونات ولكل منهم تخصص معين ولم أشارك مشاركة ذاتية فعالة في الكثير منهم وإنما كانت إختيارات من قبلي لموضوعات اقتنعت بأهميتها الجمة وكنت حريصة على عرضها عليكم وسوف تستمر هذه المدونات بإذن الله في نفس الخط الذي وضعته لها منذ البداية مع بعض الإسهامات الذاتية مني لبعض مواضيعها

نعود مرة اخرى إلى بنات أفكاري

بصراحة أنا مش هحاول أزوق الأفكار أو أنمق في الأسلوب أثناء كتابتي هنا

لأني أعتبر أن الكاتب الناجح سواء كان هاويا مثلي أو مغمورا أو محترفا مثل العديد من الأدباء الذين أثروا حياتنا الفكرية أقول - وهذه قناعتي الخاصة - لا بد أن يكون هذا الكاتب عفوي وتلقائي في نقل أفكاره حتى تكون كتاباته من القلب وإلى القلب

وبذلك تصل أفكاره بسهولة ويتقبلها ويصدقها الأخرون دون بذل أي مجهود لشرح التراكيب البلاغية المعقدة

طبعا بالنسبة لأدبائنا الكبار هم يمتلكون الحرفية اللازمة حتى لا يضيع المستوى الراقي لغويا وسط رياح التلقائية والصدق والعفوية

بالنسبة ليا بقى أنا هكتب إللي ييجي على بالي سواء بلغة فصحى أو عامية المهم إني أكتب لأن مشروع الكتابة ده متأجل عندي منذ دراستي الثانوية والجامعية

كان أمل عندي ورغبة داخلية ملحة كي أكون من المتشرفين بالعمل في بلاط صاحبة الجلالة ولكن تأتي الرياح بما لا يشتهي السفن(بفتح السين وكسر الفاء وضم النون)

أنا لم أخطىء في كتابة الحكمة السابقة إنما المخطىء من تداولها وتناقلها دون التفكير في معناها

السفن لا تشتهي رياحا هادئة من عدمها وحتى لو كانت تشبيها بلاغيا أو كناية أو أو فهي قد أخلت بالمعنى القوي للجملة

إنما الطاقم الموجود على ظهر السفينة وركابها هم من يشتهون السلامة من الرياح الغاضبة

وهؤلاء الموجودين على ظهر السفينة يدعون (السفن) بفتح السين وكسر الفاء وضم النون

نرجع بقى لموضوعي

أيوه اتمنيت أكون صحفية وإعلامية بارزة لكن وآه من لكن كل شيء راح ضاع انتهى

لذلك سأحاول جاهدة أن أكون في هذه المدونة صحفية من منازلهم وبقوانيني أنا في الكتابة

يمكن العقدة تنحل وأعوض ولو قدرا يسيرا من أحلامي الضائعة

آسفة على الإطالة

وأوعدكم بمواضيع أطول من كده بكتييييييير

خالص مودتي

و..تــحــيــاتـــي