Saturday 7 February 2009

رأيي في علاء الأسواني صاحب قصة عمارة يعقوبيان


عــمـــــــارة يــعــقــوبـيـــــان - فــي 34 شــارع طـلــعــت حـــــرب

بالأمس وأثناء متابعتي لمدونة بنت جميلة وعاقلة وبحترم كتاباتها جدا وهي الآنسة بنوتة صاحبة مدونة ورقة وقلم
وجدت موضوع جميل عرضته بعنوان وزيرة خارجية إسرائيل ...خدامة
الموضوع جميل فعلا وبيشير إلى خسة وقذارة الصهاينة

هو كان مقال لعلاء الأسواني ونقلت لينا بنوتة ثلاث فقرات منه أثاروا انتباههاا
للأٍسف لم أعلق على جوهر موضوعها بسبب استفزازي من علاء الأسواني في فقرتين كتبهم داخل المقال

وده خلاني أربط بين ماكتبه وبين موضوعي السابق الرأي والرأي الآخر


أنا مش من حقي أنفعل على صاحب الرأي إلا زي ماقلت ليكم لو كان لا يتحدث بالعقل والمنطق أو لو كان في كتاباته يتعرض لبلدي

الكتابة التي تهدف إلى التجريح فقط أنا ضدها جدا وهذا ما فعله ويفعله علاء

الجملة التي استفزتني سوف أعرضها عليكم من واقع الفقرة التي وردت فيها

ثانبا: أن قدرة اسرائيل المعنوية على ارتكاب أبشع المجازر غير مسبوقة في التاريخ
باستثناء جرائم النازيين التى تستوحى اسرائيل الكثير من
فقد وقف قادة اسرائيل يتحدثون بطريقة عادية ويبتسمون في المحافل الدولية بينما تقوم طائرتهم في نفس اللحظة بالقاء القنابل على الاطفال والنساء في غزة
ولم يحس قائد صهيونى واحد بالذنب أو الاسف أو الندم...


بل ان وزيرة خارجية اسرائيل "صديقة الوزير أبو الغيط العزيز الذى أنحنى مسرعا ليمسك بيدها لئلا تتعثر
قدمها الكريمة على السلم
ليست الا كادرا كبيرا من المخابرات الاسرائيلية

وقد اعترفت للصحافة الغربية بأنها تنكرت وعملت خادمة في بيت عالم ذرة عراقي في باريس لفترة
حتى أكتسبت ثقته وتمكنت من دس السم في طعامه وقتله ... وهذه هى اسرائيل

اتفاجئت بالجملة الإعتراضية السخيفة اللي مالهاش لازمة خالص في الموضوع
"صديقة الوزير أبو الغيط العزيز الذى أنحنى مسرعا ليمسك بيدها لئلا تتعثر قدمها الكريمة على السلم"


وكان ده ردي على الموضوع بكامله


السلام عليكم


استنادا لموضوعي عن الرأي والرأي الآخر هرد على مقالك الذي اخترتيه يا بنوتة


وطبعا من وجهة نظري وما أنا مقتنعة به تمام الإقتناع


أولا : أنا ليا مآخذ على علاء الأسواني ده من وقت عرض فيلم عمارة يعقوبيان اللي اتفاجئت بكم الفضايح اللي كاتبها

فيها ومصور مصر على إنها بيت دعارة وشذوذ
مصر فيها ناس منحرفين أخلاقيا نتفق على ذلك لكن مش كلهم مصر

وفي بداية فيلمه كان بيشير لجمال مصر وقت ماكان الإحتلال فيها واليهود فيها ومقدم الفكرة بشكل خبيث

برجاء مراجعة مقدمة الفيلم مرة أخرى

لم أحترمه نهائي لذلك لن أستطيع أن أتفق معه في هذا المقال في معظم مايقوله لأني أشعر من كتاباته أنه ضد مصر وليس معها

ثانيا: المشاهد التي حدثت في غزة ليست أحداثا جديدة غريبة فلقد حدث قبلها في مصر ولبنان والعراق والبوسنة والهرسك وغيرهم
وسوف تحدث مرات أخرى لسبب بسيط وهو أن الخير والشر باقيين إلى يوم القيامة

ماحدث في غزة رغم بشاعته طبعا أخذ حيزا إعلاميا كبيرا جدا رغم أن نفس المشاهد حدثت في لبنان وبنفس عدد القتلى ومرار وتكرارا ولم تستمر البروباجنده الإعلامية كل هذا الوقت

كل هذا الغليان هو ماتسعى له إيران وتريد أن تظل نيرانه متأججه للنيل من مصـر

وللأسف هناك من داخل مصر من يضرموا هذه النار ويزيدوها اشتعالا عن جهل وعن حمق

ثالثا:مما يزيد من عدم احترامي لعلاء الأسواني جملته عن وزير الخارجية المصري السيد / أحمد أبو الغيط
إيه معنى إنه يقول عن وزيرة خارجيةإسرائيل"صديقة الوزير أبو الغيط العزيز الذى أنحنى مسرعا ليمسك بيدها لئلا تتعثر قدمها الكريمة على السلم"

جملة مقرفة جدا وغير مهذبة وده اللي أنا اتكلمت عنه قبل كده الإختلاف في الرأي بيخللي الناس البيئة اللي دون المستوى تنهش فيمن هم على اختلاف في الرأي معهم

مين قال لعلاء الأسواني إن تسيفي ليفني صديقة أحمد أبو الغيط؟
إيه هو شكل الصداقه ده اللي بيشير ليه؟

بيعزمها في بيته مثلا وبيتفسح معاها هو وأسرته
بيسافر رحلات سياحية لإسرائيل وبينزل في ضيافتها وسط أسرتها
بيتصلوا ببعض كل شوية وبيحكيلها عن مشاكله ومنغصات حياته؟

بجد الجملة استفزتني جدا
إن يكون فيه علاقة إحترام بينهم لأنهم على نفس القوة في المنصب ولأنه بيمثل بلده كوزير خارجية يجب أن يحسن التصرف مش معناها إنها صديقته

وبعدين صدقيني يا بنوته لو علاء الأسواني كان مكانه والست بتتكعبل على السلم كان هيسندها

ولو أنا أو انتي كنا هنسندها دي تصرفات تلقائية فطرية بنعملها بدون تفكير

اتربينا عليها وعادي يعني انه يساعدها بدل ماتقع

لكن أصحاب النفوس المريضة والعقول المظلمة التي تهوى التجريح للتجريح فقط ينظروا إلى المواقف من منظور مختلف ومتخلف في آن واحد

زي ماعلقوا عليه لما كان بيتثائب في اجتماع القمه العربية بالكويت
راجل مانامش لمدة 36 ساعة حرام إنه يتثاءب؟

يعني هل التصرف ده بيجرده من عروبته ووطنيته ودينه وأخلاقه؟

ليه يعلقوا على حاجه زي دي؟

ده تصرف آدمي طبيعي وبعدين هو ماكانش بيتثاءب وبيخرف في الكلام ونايم على روحه أو ضارب مخدرات
كل جريمته إنه ناقص نوم لأنه بيشتغل وطالع عينه علشان الفلسطينيين

وبالظبط زي لما هاجموا شيخ الأزهر وقالوا سلم على بيريز
يا جماعه هو ماسافرش اسرائيل يقدم فروض الطاعه
هو لقى راجل بيمد إيده ليه فجأة واضطر انه يسلم
ماراحش يدور عليه وسلم عليه والتاني في مكانه ده العكس هو اللي حصل
برضه تصرف عادي وأي انسان مكانه كان هيتصرف زيه
تعرفي أنا مثلا برفض السلام بالإيد على الرجال لكن أوقات ممكن أكون في موقف وتلقائي ألاقي نفسي سلمت
هل معنى كده إني شخصية مهزوزة ومش ملتزمة؟أو أقصد معنى خبيث من وراء السلام؟أكيد لأ

لكن برضه النفوس المريضه هاجمت الراجل بشكل بشع ومقزز
وأعيد وأكرر لو كان حد فيهم مكانه كان اتصرف زيه بالظبط وسلم على الراجل

اللي مش قادرين يفهموه الناس دي إننا بنتعامل مع اسرائيل بشكل ديبلوماسي محض

وفي نفس الوقت مش مطولينهم أمل التقرب مننا

الرئيس حسني مبارك مش بيروح عندهم
الشعب المصري رافض التطبيع معاهم على كافة المستويات
الرئيس بيوجه ليهم كلامه بشكل حاد جدا لو حاولوا يقربوا من أمن
يعني الموضوع مش صداقه بين الحكومة واسرائيل ولا حاجه

رابعا : الجملة الأخيرة اللي قايلها فيها تنويه عن إنه رافض للرئيس حسني مبارك
مش عارفه الراجل ده مش مفهوم ليه بالنسبة لبعض المصريين؟

وأنا بقول بعض لأن كل اللي بيهللوا وبيستخدموا حنجرتهم كتير عددهم قليل
بس بيبانوا كتير علشان الأضواء بتتركز عليهم لصالح طبعا دول أخرى ضد مصر
مافيش إنسان في الدنيا خالي من العيوب ومافيش رئيس دولة صح 100 % وليس له أخطاء
ومش عيب إنه يخطىء لكن العيب إننا مانشوفش غير السلبيات فقط ونترك الإيجابيات
لابد أن يكون الحكم عادل ومنطقي ومبني على حقائق موجودة فعلا على أرض الواقع
مصر تقدمت كثيرا في عهد مبارك وارتقت وحققت انجازات
سياستنا الخارجية وعلاقاتنا بكل الدول راقية ومحترمة ولنا ثقلنا في المجتمع الدولي
أمننا يحيط به رجال يفخر أي مصري أنهم رجال أمنه والمسئولين عن سلامته

ياريت يا بنوته تشوفي الــ 13 جزء الخاصين بحديث وزير الخارجية المصري في اليو تيوب

لعلمك ناس كتير اتصلوا بالقاهرة اليوم وطلبوا الاعادة لأن فعلا الحديث رائع وهيرد على تساؤلات كتير ممكن تكون
جواكي ومشوهة شكل حكومة بلدك قدامك
خالص مودتي و تحياتي...

بس حبيبتي بنوتة فهمت اني بهاجمها هي لشخصها
وفهمتني انها لا تتفق اتفاق كامل على علاء الأسواني وليها مآخذ عليه

رديت تاني لتوضيح موقفي وكان هذا ردي:
ــــــــــــــــــــــــــــــــــــــــــــــــــــــــــــــــــــــــ
وعليكم السلام

بصي يابنوتة

ارجعي لردي مرة أخرى وهتشوفي إن كلامي كله موجه لعلاء الأسواني مش ليكي

أيوه علاء الأسواني متبني خط الهجوم على الحكومة المصرية بل وعلى مصر
انتي بتقولي ماشفتيش الفيلم وانا مشكلتي مش مشاهد مخله بالآداب في الفيلم

أنا بتكلم عن القصة نفسها المخرج مهما عمل مش هيحط أفكار من عنده هو بيصيغ القصة بالشكل اللي يصلح للعرض السينمائي في حدود توجهات الكاتب

جوهر القصة أصلا مسيء جدا لبلدك حبيبتك مصر ولشعبها

أنا شفت الفيلم في السينما وكان على نفس الصف اللي قاعده فيه اسر خليجية وكنت في منتهى الاستياء من تعليقاتهم على قصة هذا الكاتب الغير محترم زي ماقلتلك إن ده رأيي فيه
انتي ممكن في بيتك تحصل مشاكل مع والدك ووالدتك واخواتك لكن ماينفعش تروحي تحكيها للناس وتضخميها وتخللي

سيرتك انتي واسرتك ماده للحديث

أسرتك الصغيرة زي اسرتك الكبيرة اللي هي اهل بلدك

ماينفعش ييجي كاتب بيستخبى ورا بارافان الحرية وقول الحق ونلاقيه بيقول حق يراد به باطل
أنا كلامي بيكون محدد جدا لذلك انا رديت على السلبيات اللي في المقال لأن هي دي اللي تعنيني

قذارة وإجرام اسرائيل مفروغ منهم

لكن القذارة لما تيجي من كاتب مصري هي دي اللي تفرق معايا

هو بيتكلم في موضوع معين واصفا إجرام إسرائيل يبقى إيه اللي يخليه يتناول موقف إن وزير خارجية مصر سند وزيرة خارجية اسرائيل احسن تقع وإنها صديقته
انتي اتفاجئتي اني ماعلقتش على النقاط الرئيسية بالموضوع
طيب ماهو ده سبب أدعى بيعزز كلامي
واحد بيتناول موضوع معين عن الصهاينه يجيب سيرة وزير خارجية بلده بالسوء ليه؟
وبعدين بالنسبة للمقارنة بين عهدي الرئيسين السادات ومبارك لا تصلح المقارنه فلكل منهم زمنه وظروفه
وزي ماقلت كل رئيس ليه حسناته وسيئاته

بس أنا بالنسبة ليا بقول التلاته مش الاتنين يعني الرؤساء جمال عبد الناصر ومحمد أنور السادات رحمة الله
والرئيس محمد حسني مبارك ربنا يطول في
كل واحد فيهم ليه جماله وليه انجازاته وليه كبواته
وكلامي اللي ياريت تراجعيه تاني يا بنوته ان لازم لما نحكم يكون حكمنا عادل بمعنى نذكر الايجابيات والسلبيات
مش نشوه رموزنا وخلاص زي اللي بيعمله علاء الأسواني هو وأمثاله
ماتكلمتش عن النقاط الثلاث الرئيسية في المقال لان الجمل الاعتراضية للكاتب الغير محترم علاء الأسواني شوهت مقاله

وخربت المعنى المطلوب منه
انتي مافيش هجوم مني عليكي خالص يا بنوته انتي قريتي مقال وعجبتك مقتطفات منه ونقلتيها

أنا بهاجم علاء الأسواني بس هجوم محترم وفي حدود الآداب العامة


خالص مودتي و...تــحــيــاتــي
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

طبعا علاء الأسواني حر في إنه يقول وجهة نظره لكن مش صح إننا نجرح في بعض علشان نقول رأينا

أنا لما قلت عليه غير محترم أنا أعنيها لأنه شوه بلدي وشوه أهلها

خللى البنات الغلابه اللي بيجروا على أكل عيشهم وبيشتغلوا بائعات في المحلات متهتكات داعرات بعشره جنيه مع أصحاب المحلات


وخللى البلد فيها شذوذ الناس عارفين اصحابه وبيتعاملوا معاهم عادي


وخللى مصر زمان أيام الإحتلال ووجود اليهود أحسن وأنضف من دلوقتي وإن اللي وسخوها هما ظباط الثورة اللي هما


أصلا حرروها وخللوا واحد زيه يعيش في أمان وييجي عليه يوم ويهتك في عرض بلده وأهلها


لذلك قلت عليه غير محترم ولازلت عند رأيي


آسفه إني طولت عليكم لكن الموضوع أخد من تفكيري كتير وحبيت أنقله ليكم على المدونة لتشاركوني ما بداخل عقلي


تحياتي لبنوته ولكم

8 comments:

  1. عزيزتى mrs writer

    أنا متفقه معاكى فى ان مصر حبيبتى و أى بلد فى الدنيا زى مافيها الوحلو فيها الوحش و ان طبعا ما ينفعش نسوأ صورة مصر أمنا
    أنا ماشفتش الفيلم اللى انتم بتتكلموا عنه و الحمد لله انى ماشفتوش

    تحياتى

    ReplyDelete
  2. أهلا زوزو

    ربنا يكملك بعقلك يا حبيبتي

    بس شوفي الفيلم

    ده فظيع

    مافيهوش نموذج واحد محترم وأتحدى

    مطلع كل فئات المجتمع المصري زباااااااااااالة

    بالنسبة لسؤالك التقني

    ابعتيلي إيميلك مش هينفع أكتب الكود هنا

    وماتخافيش على إيميلك مش هعرضه

    إيميلك في بير يا معلم

    تــحــيــاتــي

    ReplyDelete
  3. و الله بوستك حلو اوى و كلامك منطقى جدا و معجبة بيه اوى

    للآسف الفيلم معرضتش نموذج واحد مصرى عدل و كأن مصر دى بلد الزباله كلها



    بصى مصر مش أحلى بلد فى العالم و لا هى الدولة المثالية
    آه فيها حاجت وحشة بس برضه فيها حجات جميلة أوى أوى حرام نقعد نبين المساوىء و نجيب حجات زبالة و موجودة بنسبة قليلة و نجيبها هى دى المحور الأساسى بتاع البلد

    ReplyDelete
  4. قارئة جديدة من العاقلات تشرفني بالمرور لمدونتي

    أهلا بيكي نورتيني

    وبحمد ربنا إن لسه فيه ناس ممكن يقروا ويحللوا الكلام ويستوعبوا الأفكار

    خالص مودتي ليكي

    و..تــحــيــاتــي لدماغــك

    ReplyDelete
  5. امممممممممممممممم
    دا انتى اتكلمتى فى موضوع كبير اوى
    واتناولتية من كل الجوانب
    ووضحتى رأيك كويس جدا

    انا رأيي ان
    مصر فيها عيوب كتير ومش احسن دولة فى العالم
    لازم نعرف اخطائنا ونصلحها
    لازم نواجة نفسنا
    بس مش معنى دا اننا نتحول فقط للنقد
    نعلق على اتفة حاجة بتحصل ونعمل منها موضوع
    بس عشان اتعودنا على نقد او لان مش عاجبنا الحال
    بالشكل دا وعايزينوا افضل

    يعنى كل حاجة بتتاخد بالعقل
    وكل حاجة الوسط فيها حلو
    حط نفسك مكان الناس المسؤلة دى
    وشوف هتعرف تتصرف بشكل مناسب او افضل او اسواء
    منهم فكر فى حلول للمشاكل اللى انت شايفها واطرحها
    وناقشها مع الناس مش ننقد وبس

    بالنسبة للفيلم هو بيطرح قضية ومش هنكلم ان فى ناس كدا فى مصر فعلا بس هقول ان الفيلم اساء طرح الفكرة
    وكمان محطش ليها حلول صحيحة ومناسبة على الاقل يحسن
    بيها الصورة
    وكمان كان لازم زى ما حط صور لناس سيئة يحط صور
    لحياة ناس شريفة عايشة بتحب
    بلدها بتحاول تغير من نفسها
    عشان بكرة يكون افضل لأولادها

    تقبلى مرورى

    ReplyDelete
  6. أهلا بالطفله الرومانسيه

    انتي اتكلمتي عن حاجه فعلا تاعباني جدا من الفيلم ده وهي ان مافيش ولا نموذج اتعرض يمثل شخصيه سويه ومحترمه

    بلا استثناء يا أختي الحبيبه مافيش أي شخصيه نظيفه داخل الفيلم

    حول المجتمع الى مجتمع نجس

    وزي ماقلت في الموضوع أيوه أكيد فيه نماذج فاسده لكن أقليه جدا ومش هما كل مصر

    شرفتيني بتعليقك وفي انتظارك دايما

    خالص مودتي لكي
    وقبلاتي لسومه

    ReplyDelete
  7. موضوعك دسم جدا وانا تعبانه جدا بس هاقول ر اي في نقطه بسيطه
    انا شوفت فيلم عماره يعقوبيان وهاتكلم عن الفيلم مش القصه لاني ماقراتهاش
    انا شوفته مره وماكررتهاش لانه ببساطه وراني مصر وحشه اوي وانا مش بحب كده
    مش عارفه ليه الكل بقي بيشوف نقط الحبر السودا علي الثياب الابيض بس
    مابيشوفوش باقي الثوب
    وكله بيزعق باعلي صوته علي اي حاجه وحشه او تزعله في وقت مابتسمعيش اصواتهم وهم فرحانين من مبدأ داري علي شمعتك

    مصر مش وحشه
    ولو في حاجه يستاهل يتقال عليها وحشه يبقي احنا
    الاشخاص
    مش التاريخ ولا البلد

    ReplyDelete
  8. أهلا حبيبتي عاشقه

    ربنا يقويكي وتحققي نجاحات باهرة في شغلك

    كلام سليم وده اللي أنا قصدته

    كل مكان فيه ايجابيات وسلبيات

    ومصر بلدنا الغالية فيها ناس فاسدين لكن قليلين إلى جانب الناس الفاضلة المحترمة الصالحة

    لذلك استأت جدا من كاتب مصري بيتكلم عن بلده بأسوأ ما يتحدث عنها ناس غريبه حاقدة عليها وعلى شعبها

    نورتيني يا عاشقه

    في انتظارك دائما

    خالص مودتي وتحياتي

    ReplyDelete