Monday 2 February 2009

الــرأي ..والــرأي الآخــــــــــر


الموضوع ده جدير بالتأمل فعلا


بطبيعة تكويني الشخصي بكون في حالة تأمل مستمرة لما يحدث من حولي


عندما يتحدث أمامي الأشخاص أتعامل مع أحاديثهم برؤية المشاهد وليس المستمع فقط


أتناول كلماتهم وتعابير وجوههم ودرجة ارتفاع نبرة الصوت


وأتعجب كثيرا


كل إنسان يعتبر أن رأيه هو الأصح والجدير بالإهتمام


الأحاديث بين الناس تتحول في معظم الأحيان إلى حروب كلامية


تنتابني حالة من القرف مصحوبة بالضحك على أساس أن فيه هم بيضحك


بشوف ناس بتتكلم كلها في وقت واحد


منتهى الغوغاء والهمجية


منتشرين جدا في برامج التوك شــو


طيب إيه المانع كل إنسان يعرض وجهة نظره بطريقة هادية والطرف الآخر يرد عليها بطريقة راقية ومحترمة


قد نختلف في الرأي لكن مش معنى كده إننا ننهش بعض


الأزواق لا تناقش لكن الأفكار تناقش


لماذا تتحول مناقشاتنا إلى معارك ولا نراعي حتى عندما تكون هذه المناقشات على شاشات التليفزيونات؟


لماذا لا نتفهم أن كل إنسان له الحق في تكوين وجهة نظر حيال موضوع ما وأنه ليس من حق الآخرين معاقبته على توجهه هذا؟


لماذا لا نتناقش مناقشات موضوعية على أسس وقواعد أكاديمية تصل بنا إلى تكوين رأي موحد يتفق عليه الجميع لو كنا نتناقش حيال قضية حيوية ما؟


يحتاج الأمر منا إلى تدريب للذات فلماذا لا نبدأ بأنفسنا ونطور من شخصياتنا وأفكارنا؟


السؤال الذي يفرض نفسه حيال هذا الموضوع هو :


هل وصل بنا الحال إلى أننا لا نستطيع التعامل بهدوء وضبط أعصاب إلى هذه الدرجة ؟


لماذا لا نعرض وجهات نظرنا المعارضة بأسلوب مهذب وعلمي وقائم على أساس طبعا لأن من الخطأ تبني وجهة نظر بعيدة عن المنطق والعقل


أنا كلامي السابق كله عن وجهات النظر السليمة المنطقية


طيب عندي مثال واضح جدا بالنسبة ليا


في موضوعي السابق بهذه المدونة تحدثت عن رأيي في وزير الخارجية المصري وتناولت بالتحليل البسيط موضوع غزة وكتبت رأيي في حكومة بلدي


لاحظت ملاحظة لطيفة خالص


دخل الموضوع عدد لا بأس بيه ولكن الغريب أني لم اتلقى أي تعليق من أي واحدة منهم


وفيهم صديقات ليا وأنا على علم بأنهم مختلفين معي


لكن إيه اللي منعهم من الكتابة لتوضيح وجهة نظرهم الشخصية؟


حتى لو مخالفة لفكرتي ايه المشكلة إن وجهات النظر المختلفة تتكتب وتتناقش؟


وده اللي خلاني أسأل سؤال : هو احنا مابقيناش عارفين ازاي نتناقش ونختلف؟


يعني لا عارفين نتفق ولا عارفين نختلف؟


دي كارثة


يعني القصة مش قصة إن زعماء الدول العربية مش عارفين يتحدوا ويتفقوا


ده الفايروس واصل لينا احنا كمان


أرجو إن وجهة نظري تكون وصلت ليكم


وفي انتظار مناقشاتكم الجادة


خالص مودتي حتى لو اختلفنا في الآراء


و....تــحـيــاتـــي


10 comments:

  1. السلام عليكم
    على فكرة أنا أول ما قرأت عنوان البوست عرفت ان ده هيبقى موضوعك
    على فكرة أنا أول ما قرأت الموضوع ايللي فات انا مرضتش أرد عليه وبعدين قرأته تانى يوم وقلت أطرح وجهة نظري المختلفة باسلوب مهذب عشان يبقى حوار راقى وفعلا أنا لما قرأت تعليقك انبسط انك تقبلتيه والحوار بينا بيدل اننا بنشجع الاحترام للاخر والحوار الراقى
    تانى حاجة باختصار شديد النظام العربى بأكمله عايز احلال وتجديد بجد مش هما دول المسلمين ولا دول أحفاد عمر بن الخطاب ولا أتباع صلاح الدين
    لكن فى النهاية أنا شخصيا بدعى ان ربنا يهديهم وينور بصيرتهم
    الامام الشافعى رحمة الله قال رأى صواب يحتمل الخطأ ورأيك خطأ يحتمل الصواب
    تحياتى ليكى ودمتى بالخير

    ReplyDelete
  2. أهلا بالبنوتة الجميلة

    أهلا بالأستاذة كاتبة القصص الرهيبة

    والله يا بنوتة أنا احترمت رأيك جدا وخصوصا إنك عرضتيه بشكل مهذب

    بالإضافة إنك مش هجومية بمعنى انتي ليكي وجهة نظر أو ليكي أحلام بتتمنيها من حكومة بلدك لكن لا تنهشي فيها

    المشكلة مع الجزء اللي بيعبر بشكل وقح جدا وبشراسه غريبه

    بحزن من تفكيرهم وبحزن من عدم رغبتهم للحوار

    بمعنى إنهم بيكونوا متبنيين لوجهة نظر معينة ولا يستمعوا إليكي أصلا

    هي دي الفئة اللي لفتوا نظري وخلوني اكتب

    بشوف منهم في البرامج السياسية الخفيفة

    نورتيني كالمعتاد لا حرمني الله من تعليقاتك الثمينة

    خالص مودتي

    و..تــحــيــاتـــي

    ReplyDelete
  3. في مقوله سمعتها زمان قوي بتقول اتفق العرب على الا يتفقوا
    وياريتها بتيجي على كده دول كمان بيجرحوا في بعض وبيقلوا ادبهم على بعض نفسي فعلا نتعلم ازاى ننصت للراي الاخر حتى لو مش مقتنعين
    تحياتي ليكي

    ReplyDelete
  4. أهلا يا حاسوباتية

    عندك حق فعلا

    الموضوع واضح جدا بين العرب بكل جنسياتهم

    وطالما لا توجد قنوات للإتصال بينهم وبين بعض يبقى ازاي يتناقشوا في مواضيعهم ومصالحهم

    كل واحد في أثناء حواره مع الآخر يكون في حالة تحفز

    بالإضافة إلى العصبية والتحيز لرأيه ورغبته في السياده على الجميع وانصياعهم لهذا الرأي

    نورتي موضوعي يا حاسوباتية

    تــحــيــاتـــي

    ReplyDelete
  5. حبيبتى mrs writer

    وحشانى

    معلش اتأخرت عليكى

    بسموضوعك جميل قوى

    أسلوب النقاش و الحوار فعلا حاجه لازم ناخد بالنا منها

    على الأقل زى ما بنحب اللى بنكلمه يسمعنا
    لازم احنا كمان نسمع اللى بيتكلم

    لازم يكون فيه احترام

    ReplyDelete
  6. أختي الرقيقة زينب

    وحشتيني خالص والله

    فينك يا قمراية؟

    خالص احترامي لاحتوائك لمعنى موضوعي

    بارك الله لكي في عقلك

    العقل السليم يريح صاحبه ويريح المتعاملين معه

    لا تحرميني من مرورك العطر بموضوعاتي

    خالص مودتي

    ReplyDelete
  7. متفقة معاكى جدا
    أحترم جدا النقاش البناء وتوضيح وجهات النظر المختلفة

    عندى سؤال:ازاى بتعرفى اللى دخلوا عندك حتى لو ماعلقوش؟

    ReplyDelete
  8. أهلا بيكي يا موناليزا

    معرفة عدد من قرأوا موضوعك عن طريق وضع لينك إحصائية عدد الزائرين بيعرفك الإجمالي وعدد الموجودين كل يوم

    وأنا بعتبره مهم زي التعليقات لأن المهم بالنسبة ليا هو تأكدي أن المعلومات التي أقصد بها إفادة الناس قد وصلت لعدد لا بأس به

    اللينك لموقع الإحصائيات هو :

    http://www.123compteur.com/services-webmasters.php

    وده بتروحي ليه وتختاري منه الشكل اللي عاجبك وتنقلي اللينك في الجافا هيظهر عندك على الهامش الخاص بالمدونة

    نورتيني

    و...تـحــيــاتــي

    ReplyDelete
  9. بصى خلاصه الكلام
    اننا شعب جبان
    بنخاف نتكلم فى السياسه
    ومش بتعرف نتفق ده حقيقى
    وكمان الهمجيه فى الكلام وعدم احترام الراى الاخر
    فده لاننا شعوب متخلفه
    وكل واحد عايز يقول رايه هو وبس ومش مهم الطرف التانى
    نفس الشئ بالنسبه للزعماء
    وده سبب خيبتنا

    ReplyDelete
  10. عاشقة الرومانسية

    أهلا بيكي

    انتي جدعه خالص

    جبتيها من الآخر وعرفتيني الحكاية

    فعلا عندك حق فيه جبناء كتير

    وفعلا لا بنعرف نتفق ولا بنعرف نختلف

    وفيه كتير متخلفين وهمجيين

    تورتيني

    خالص مودتي

    و...تــحــيــاتــي

    ReplyDelete