Saturday 11 April 2009

رحلتها من الحياة إلى الموت في 8 ساعات





هي بنت عمتي

قريبة جدا لقلبي

طيبة وقلبها جميل ولا تحمل ضغينة لأي إنسان في الدنيا

متواضعة ومؤمنة بالله وتخشاه في كل قول وفعل

بقالي سنين ماشفتهاش

ظروف سفري وانشغالي بأولادي ووجودي في محافظة غير المحافظة التي تقيم بها جعلت مايصلنا ببعض مجرد إتصالات هاتفية من وقت للآخر

من حوالي أٍسبوعين ويوم الجمعة تحديدا هاتفتها وجدت صوتها مختلف قلبي خاف عليها قوي


وقررت في لحظة إني أسافر أشوفها وقلتلها فيه ناس جايين ليكي بكرة بإذن الله


قالتلي يا فرحة قلبي يابنت خالي أخيرا هتيجي وأشوفك انتي وحشاني قوي


سافرت يوم السبت فعلا وفي الطريق من الإسكندرية للزقازيق كنت أتأمل المناطق الزراعية والفلاحين وحيوانات الغيطان والبيوت الريفية البسيطة

المنظر كان يأسر القلوب لكن أنا قلبي كان مش مرتاح وماكنتش فاهمه ليه جوايا الغصة دي


وصلت ولقيتها شكلها مختلف وغريب ورغم كلامها وضحكاتها لكن أنا كنت مش مرتاحه


لم أنم طوال الليل وقلبي كأن عليه صخره كبيرة وحاسه إني بموت وبناءا على ذلك قررت الرجوع للإسكندرية مع انبلاج خيوط الصباح

سمعت صوتها في السادسه والنصف تتحدث مع ابنها وزوجته الذين استيقظوا على مكالمة منها تطلب منهم الصعود لها في مسكنها

قالت إنها من الساعه الثالثه صباحا تجلس مستندة على المنضدة ولا تدري مابها وماذا يحدث لرأسها

وطلبت منا أن نتصل بالإسعاف لكن إبنها طمأنها إن ضغطها طبيعي وفقط ماتعاني منه آلام في القولون

ومن وقتها للساعة الحادية عشرة قبل الظهر وأنا أرى تغيرات انتقالها من الحياة للموت
رأيت سكرات الموت وماتفعله بالإنسان

جاء الطبيب وجاءت سيارة الإسعاف لكن بلا طائل

قضاء الله نافذ واسترداد الله لودائعه يتم في ميقات محدد لا يعلمه إلا علام الغيوب

توفت إبنة عمتي الغالية في غضون ثماني ساعات بدأت فيها سكرات موتها

كنا حولها وإلى جانبها ونحن لا ندري أن ملك الموت موجود معنا يؤدي مهمته التي أوكله الله بها

التجربة بالنسبة ليا كانت ثرية بأشياء متنوعة فيها الكثير من الألم ولكن بها أيضا فوائد استقيتها مما حدث

للموضوع بقية مع كل ما شاهدته ولاحظته وتعلمت منه سواء من حالة الوفاة أو من مشاهداتي وأحاديثي مع أفراد العائلة أثناء فترة العزاء

بإذن الله أعرضها لكم لعلكم تجدوا فيها فوائد تنفعكم

أسألكم الفاتحة والدعاء لها بالرحمة والمغفرة

دمتم سالمين

18 comments:

  1. لا اله الا الله
    انا استغربت غيابك الفترة اللى فاتت

    تجربة الموت تجربة قاسية جدا
    ربنا يرحمها ويغفر لها
    ويسكنها فسيح جنــاته
    يصبرك ويصبر اهلها

    تقبلى مرورى

    ReplyDelete
  2. لا اله الا الله
    البقاء لله
    ربنا يرحمها ويغفرلها ويجعل قبرها روضة من رياض الجنة
    اللهم انا نعوذ بك من عذاب الموت
    ربنا يصبر قلوبكم ياحبيبتى

    ReplyDelete
  3. للفقيدة الرحمة
    ولك واسرتها الصبر
    ومن منا يملك من امر نفسه شيئا
    مهما طالت الايام فكلنا لهذا المصير لا محالة
    والحمد لله انك شوفتيها رغم صعوبة الحدث امامك

    ReplyDelete
  4. لا اله الا الله

    البقاء لله يا مصرية ويارب يصبركم ويصبر أهلها

    ويجعل مثواها الجنة ان شاء الله

    ReplyDelete
  5. انا كنت خايفة من غيابك
    ودعيت كتير
    ا يكون المانع خير
    بس لما عرفت بجد
    انا
    مش عارفة اقولك ايه
    غير ربنا يرحمها
    ويتقبلها في عباده الصالحين
    ويجمعك بيها فالجنة بعد عمر طوييييييييييييييل
    في رضا الله تبارك وتعالى

    قلبي معاكي

    وربنا يجعلها اخر الابتلاءات
    ويبارك في عمرك وعمر كل احبائك يارب


    مع خالص دعواتي
    وعزائي

    وربنا يصبرك
    ويصبر اسرتها

    و

    ReplyDelete
  6. عارفة انك دوختيني

    انا لفيت مدونة مدونة

    وابص في التواريخ

    اشوفك يمك مثلا
    راكنة واحدة وبتكتبي بوستات فالتانية

    ابدا

    كلهم توارخهم متقاربة
    وفي نفس توقيت
    انقطاعك
    مفيش بوستات


    ربنا يصبرك

    ويجعلها
    اخر مرة تبعدي عننا


    وحشتيني

    ReplyDelete
  7. انا لله وانا اليه راجعون

    ربنا يرحمها برحمته ويغفرلها

    ويصبركم على فراقها

    والله قلقت عليكي كتير

    لانك مختفية بس قلت اكيد عندها ظروف

    ربنا يصبرك

    دمتِ بحفظ الرحمن

    ReplyDelete
  8. البقاء لله

    ربنا يصبركم يا حبيبتي

    والله انا جسمي قشعر وانا بقرأ

    ربنا يرحمها ويدخلها جنته أمين

    انا عارفة ان التجربة مش سهلة لأني مريت بتجربة شبيهه بس ربنا يجعلها في ميزان حسناتك يا رب

    بحبك في الله

    ReplyDelete
  9. ربنا يبارك في عمرك يا رب

    ReplyDelete
  10. البقاء لله وحده
    اعانك الله وصبرك
    ربنا بعتك ..علشان تنقلى لنا ماحدث كى نتعظ ولاننسى الاخره
    نحن نيام واذا متنا صحينا على الحقيقه
    الله يرحمها ويجعل مثواها الجنه..

    ReplyDelete
  11. لا إله الا الله
    انا لله وانا اليه راجعون
    الله يرحمها رحمة واسعة
    ومن فضل ربنا عليك انك تودعيها
    شدي حيلك وربنا يراضينا كلنا بقضاءه
    مش مهم ها نستفيد ولا ايه ها تنقليه
    فيه ناس لهم بالموت واعظ
    وفيه ناس ليس لهم واعظ رغم كثرة المواعظ
    تحياتي

    ReplyDelete
  12. البقاء لله وفعلا يعني قصه غريبه ربنا يرحمها يارب ويصبركم

    ReplyDelete
  13. ربنا يرحمها رحمة واسعة ..

    ويجعلها من اهل الجنة ..

    زمنتظرين قصتك حبيبتى ..

    ***

    حبيبتى بالله بالله ما تزعلى منى ..

    والله العظيم لسه امبارح بعد ما نشرت تدونتى داخلة عندك فى مدونة للنساء فقط وكنت هاكتبلك فينك حبيبتى مش باينة بس جوزى احتاج النت فاضطرت اقوم ..

    والله العظيم كنت فاتحة المدونة ولسه هارسل الرد لاقته بيقولى عايز الجهاز ضرورى ..

    دخلت لقيتك رادة عندى ..

    والله كنتى فى بالى وبفكر فى غيابك ..

    ما تزعليش منى بجد لانى هاضيق بجد لانك غالية عندى ..

    أحبك فيه ..

    ReplyDelete
  14. أخواتي في الله الحبيبات :
    ـــــــــــــــــــــــــــ

    إحساس الطفولة الرومانسية الواقعية
    أمة الله الغالية موناليزا المميزة
    بنت مصر العاقلة صاحبة الكلمات الحكيمة
    سوبيا المبدعة
    نوارة ملكة الأناقة والزوق العالي
    بنوتي ليدي الجميلة المتزنة
    السيدة الفاضلة الفراغ
    ستيتة العلوم أخف دم في بر مصر
    حاسوباتية عروستنا القمراية
    لجين أميرة الزوق والأدب ورقة المشاعر

    أشكركم جميعا على اهتمامكم بتقديم واجب العزاء ولا أراكم الله مكروها في عزيز لديكم

    النهارده بإذن الله هكتب لكم مشاهداتي في الفترة السابقة على الناس وعلى الأشياء التي رأيتها وسمعتها
    يارب تستفيدوا من كل نقطة أعرضها عليكم

    دمتم في حفظ الله سالمين

    ReplyDelete
  15. حبيبتى المصريه الغاليه
    رحم الله مواتكم وموتى المسلمين
    والحمد لله الذى رزقنا فى الموت عظه
    والله الذى لا إله إلا هو ...من لا يتعظ بالموت فلن يجدى معه الكلام نفعا"

    جزيت خير على نقل اللحظات المؤلمة لنتعظ
    رحمها الله ورزقكم الصبر على البلاء

    ReplyDelete
  16. أختي الغالية أم البنات

    عظم الله أجرك وتقبل منك دعواتك الصالحة

    خالص تحياتي ومودتي

    ReplyDelete
  17. انا لله وانا ايه لراجعون

    البقاء لله حبيبتي

    سبحان الله كتب الله لك وداعها

    بالرغم من ايام الغياب

    فى انتظار باقى البوست بلهفة

    بجد سامحينى انا الفترة اللى فاتت كنت بتواصل فى التدوين بالعافيه وفى حياتى كلها بجد انا اسفه
    المشكله انك مدوناتك كتير ومتابعتك صعبه شويه
    ةاللينك اللى سيبتهولى فضل معلق لحد ما زهقت
    وبعدين انا بجد سعيده بعتابك ليه لانى فعلا لم اقصد اى معنى وحش لكن توهة الحياه
    اتعلمت منك النهارده درس كبير قوى ومهم قوىلا
    وهو انى مزعلش ولا اخد موقف من غير عتاب
    لأنى بعمل كده كتير وبخسر ناس حلوين وبحبهم
    تحياتى ليكى ولروحك الجميله
    بجد انا متشوقه جداااااااااا لباقى البوست

    ReplyDelete
  18. أهلا حبيبتي

    أيوه كده عرفتيني قيمتي عندك

    مرورك حقيقي فرحني وحسيت إن رأيي فيكي في محله وانك تستحقي العتاب لأنك فعلا من الأخوات الأحباب قوي

    ربنا يخليكي ليا وشكرا لمرورك

    بالنسبة لباقي البوست نزل من فترة بعنوان نماذج أعجبتني وأخرى أزعجتني هتلاقيه بعد البوست ده

    دمتي سالمة بحفظ الرحمن

    ReplyDelete