Monday 13 April 2009

نماذج بشرية أعجبتني وأخرى أزعجتني


إسمحولي أعرض عليكم مشاهداتي في الفترة السابقة على الأشياء والناس من حولي


وسامحوني إذا أطلت عليكم وطبعا مش هحكي كل حاجه علشان ماتشعروش بالملل


تكويني الشخصي والعقلي يجعلني ألاحظ وأحلل وأصل إلى نتائج مما أراه وفي ذلك فائدة لا أريد أن أحجبها عنكم بل أريد مشاركتكم لي فيها لأنكن أصبحتن أخواتي اللاتي لم تلدهن أمي


طريقة العرض هتكون في نقاط ولا يوجد ترابط بين كل نقطة وأخرى لأني هتكلم في خطوات منذ بداية سفري حتى رجوعي إليكم


بسم الله أبدأ:

ـــــــــــــــــــــــــ

1- في الطريق من اسكندرية للزقازيق لاحظت روعة المناظر الطبيعية في بلدنا وسرحت بعقلي لماذا لا نقوم بتحويل أراضينا الصحراوية إلى واحات خضراء ثرية بالمحاصيل التي تكفينا وتزيد فنقوم بتصديرها وزيادة دخلنا القومي لخدمة مشاريع تنموية أخرى - مجرد حلم أتمنى أن تحوله بلدي إلى واقع ملموس

أثناء فترة دراستي الجامعية أخبرنا أحد الدكاترة بمعلومة رهيبة - قال لنا أن الصومال التي تعاني المجاعة إذا تمت زراعة أرضها سوف تطعم العالم كله شرقي وغربي ويفيض أيضا وذكر لنا المعلومة بالأرقام وأشاد بجودة أراضي الصومال وصلاحيتها للزراعة - حقيقي عجبي على حال البشر

***************************

2 - تابعت وجوه أهل الريف تعلوها مسحة من الرضا والسعادة بحياتهم النقية البسيطة بالإضافة لحالة من الإسترخاء والهدوء لا ألاحظهم نهائيا في أهل المدينة بل على العكس وجدت معظمهم متجهمين متوترين وينتظر كل منهم للآخر على غلطة حتى يفجر في وجهه كم من الغضب لا يتناسب مع حجم الموقف - رأيت وسمعت ألفاظ غير لائقة توجه من أشخاص لبعض واستأت كثيرا

*****************************

3- الكوارث المتحركة المسماة بالميكروباصات يقودها سائقين أغلبهم في سن صغيرة متسرعين غير مبالين بأرواح الناس وطبعا تنتشر بينهم المخدرات بشكل ملحوظ في طريقة نطقهم للكلمات بطريقة غير واضحة للسامع

شاهدت حادث في داخل مدينة الزقازيق وبمنتهى البساطه الميكروباص طالع من شارع جانبي وبدلا من أن يدور يمينا ليأخذ الطريق الرئيسي سار في خط مستقيم وداس أحد الأبرياء ممن كانوا يسيروا على الرصيف -

منتهى انعدام الضمير والأخلاق - طول عمري أعرف إن القيادة فن وزوق وهؤلاء السائقين لا فن ولا زوق ولا ضمير ولا أدب

**********************************

4 - زيادة الوزن مصيبة كبيرة أحذركم جميعا منها بل وأصرخ وأدق كل نواقيس الخطر لاتسمحوا بتراكم الشحوم والدهون فهي مؤذية جدا بشكل رهيب ومخيف ووصول الجسد لحالة من الضعف حيث لا يقوى على الحركة ويكون المحيطين به هم الذين يحملون مشقة حمل الشخص الممتليء للذهاب به إلى المشفى أو لزيارة ضرورية يكون ذلك مؤلم جدا لصاحب الوزن الزائد نفسيا وصحيا -

أرجوكم من يجد في وزنه كيلوات زائدة يبدأ بمنتهى العزم والتصميم على إنقاصها

*************************************

5- كيفية تربيتنا لأبنائنا مهمة جدا جدا لأن من نزرعه نحصده وإبنة عمتي الراحلة كانت نبعا من الحنان والدفء لأبنائها مع الحزم المتعقل وذلك أنتج أبناء بارك الله فيهم على برهم لأمهم وما زرعته هذه السيدة الطيبة قد جنته بحب أبنائها لها والتفافهم حولها وخدمتها وتكريمهم لها في مرضها وبعد موتها -

ساعدوا أبنائكم على بركم وكونوا لهم أصدقاء ولا ترهبوهم وأنتم في مرحلة القوة والعنفوان لأن الأيام دول وفي وقت سوف تصبحون ضعفاء وتكون القوة لهم فاعملوا حساب تلك الأيام

************************************

6- إذا لاقدر الله وجدتم شخص أمامك يخبركم إنه حاسس بتعب شديد ويريد الإسعاف سريعا لا تستهينوا بشكواه وأسرعوا لإنقاذه وإذا اتضح إن شكواه بسيطه خير مش هتكونوا غرمتم غير مصاريف عربة الإسعاف

إحنا عندنا مشكلة مش لطيفة في بلدنا

تلاقوا الطبيب يقول للمريض ياعم انت زي البمب ومافيكش حاجه وينخدع بمظهر المريض إذا كانت تبدوا عليه الصحة

يستهين بطلب الفحوصات المختلفه بل ويعارض

بتحصل معايا كتير ولما بقابل طبيب من هذا النوع لا أحترمه

الآشعات والتحاليل صورة لجسم الإنسان لا يستطيع الطبيب مهما كانت براعته أن يكتشف المرض إلا بعد عمل هذه الفحوصات

انتبهوا لصحتكم وصحة من حولكم ولا تستهينوا حتى لو الشكوى بسيطه حتى لا تتركوا الأمور تصل لنقطة صعبة

أبعد الله عنكم كل مكروه وشفاكم وعافاكم من كل سوء

************************************************


نماذج بشرية تستحق أن أتوقف عندها:

_______________________


النموذج الأول

ـــــــــــــــــــــــــــــ

سيدة ريفية بسيطة غلبانة كانت تأتي إلى إبنة عمتي لرعايتها أثناء وجود إبنها وزوجته بالعمل

تحمل قلبا جميلا رقيقا

أصيلة وطمرت فيها العشرة وكانت دموعها لا تتوقف على الراحلة

دموع صامتة تحمل الكثير والكثير من كم الحب الذي تحمله لها بداخلها

المصريين وخاصة البسطاء منهم عبارة عن قلوب يوجد داخلها بشر طيبين لا يحملوا غلا ولا كرها ولا ضغينة

حتى من يحاول أن يتصرف بلؤم من أهل الريف في مصر لا يستطيع الإستمرار لأن طيبته الفطرية تغلبه

*******************

النموذج الثاني

ـــــــــــــــــــــــــــ

إمرأة عاشت حياة الرفاهية والتدليل أخذت حقها من الحياة كاملا أثناء حياة زوجها ولكن بعد وفاته حدث داخلها كسر كبير وشرخ رهيب في قلبها وحياتها

المصيبة الكبرى عدم اهتمام أبنائها بها ورؤيتي لدموعها تسيل على وجنتيها تشكي وتحكي عن تغير حال الدنيا من النقيض للنقيض مع جمود مشاعر أولادها التي تذوب حبا بهم وبأبنائهم - بر الأم والأب واجب مقدس عليكم وخاصة في ضعفهم لا تأخذكم دوامة الحياة وتقولوا ماذا نفعل ؟ظروف العمل وظروف الحياة ضغوطها

لا تستمعوا لهم عندما يقولوا لكم لا تشغلوا بالكم بنا نحن بخير اهتموا بأنفسكم وبيوتكم وحياتكم -

أرجوكم اجعلوا أوقات وليس وقتا لرعاية آبائكم بعد وصولهم لمرحلة عمرية لا يستطيعوا فيها تقديم المزيد لكم وكونوا واثقين أن الأمراض التي ألمت بهم نتيجة شقائهم معكم عندما كنتم صغارا تحتاجون لرعايتهم - الآن جاء دوركم لرد جزء بسيط من حقوقهم عليكم

**************************

النموذج الثالث

ـــــــــــــــــــــــــــــ

سيدة ريفية ترملت في سن صغيرة جدا جدا وترك لها زوجها إبن وإبنة

أطلق عليها لقب ( الأصيلة ) لأنها أغلقت عليها باب بيتها على صغارها ورفضت الزواج وقامت بتربيتهم على أعلى مستوى من الأخلاق والصلاح والتقوى ووصلوا لبر الأمان في ظل هذه المرأة التي تساوي عشرات من الرجال

الغريب أنها لا تقرأ ولا تكتب ولكن الحكمة تنساب من بين حروف كلماتها

تسأل دائما عما خفي عليها وتستوعبه وتطبقه

تستعمل الهبه التي وهبها الله لنا وميزنا بها عن سائر المخلوقات وهي نعمة العقل بأحسن ما يكون

وأقسم بالله هناك متعلمين لا يرقوا إلى مستواها إطلاقا

تتحدث عن قربها من الله بعد غياب زوجها وتقول أن لولاه لما كانت استطاعت الإستمرار

سمعت منها جملة أعجبتني وأفادتني:

ــــــــــــــــــــــــــــــــــــــــــــــــــــــــــــــ

قالت أنها تسبح الله كثيرا وتذكره كثيرا وتشعر بعد التسبيح أنها قد أعطت نفسها شحنه كي تعمل طاقتها بأعلى مستوى وأنها إذا أهملت وانشغلت تشعر بالوهن فتسارع كي تشحن روحها مرة أخرى

عبرت عن المعنى بمنتهى العفوية وبلفظ بسيط وقوي جدا في معناه الروحاني والإيماني

تحضر ندوات بمسجد قريتنا وتستفيد وتستمتع بهذه النفحات الإيمانية التي تعينها على مشقة الحياة

أسموها ( المصلحة الإجتماعية ) لأنها تعمل على إصلاح ذات البين والتقريب بين المتخاصمين

سألتني في أمور كثيرة وكانت سعيدة عندما أجبتها عن ما يدور داخلها ولا تعرف إجابات عليه

حقيقي تحية تقدير وإعجاب لهذه السيدة الأصيلة

*************************

النموذج الرابع

ــــــــــــــــــــــــــــ

رجل طيب ويحب عائلته جدا ويقوم بالواجب مهما كانت مشقته

سافر من العريش إلى الزقازيق ووصل مساءا لتقديم واجب العزاء وعاد بعد أقل من ساعة ليبدأ رحلة العودة مرة أخرى إلى العريش رغم انه مريض وتعرض لتعب شديد أثناء رحلته هذه

ولكنه نشأ وتعلم جمله هامه جدا وهي :

( الواجب رخيص وغالي)

والمعنى أنكم عندما تقوموا بالواجب تجاه إنسان

فمهما تعبتم فإن التعب سوف يزول لذلك فالتعب رخيص إلى جانب قيمة تصرفكم عند من قدمتم لهم هذا الواجب فأصبح أغلى عندهم من كنوز الدنيا لذلك الواجب رخيص وغالي

***********************

النموذج الخامس

ــــــــــــــــــــــــــــــــــــ

عمتي الكبيرة أطال الله في عمرها وحفظها لنا

ست الستات وست الحبايب

حبيبة الكل وعمرها مازعلت حد منها

في حالها مالهاش في القيل والقال

وقضت أوقات الصحة والشباب كلها من أجل من حولها

فقدت اثنان من أبنائها الذكوربعد أن أصبحوا رجالا آباءا وجدودا

الصدمة كانت رهيبة لكنها واجهتها بمنتهى الصبر والإيمان وعندما كنا نعزيها كنا نبكي وهي تتحدث بشكل طبيعي وتسألنا عن أحوالنا وأبناءنا

تتحدث معي كثيرا وتحب وجودي معها

وانا بتعلم منها وبستمتع بحديثها

قالت بدل ما نطلع الكلمة الوحشة نطلع الكلمة الحلوة هو يعني هيجرالنا إيه ولا لازم كل واحد ينتصر لنفسه ريحوا الناس وسيبوا كل واحد على قد عقله

قالت الصحة ترياق الجسد ومافيش أغلى منها

قالت البعد عن الناس غنيمة وتتعامل مع من يأتيها في بيتها بمنتهى الود والأدب حتى لو مزعلها علشان هي بتتكسف - قالتلي الجملة دي والله العظيم شفت احمرار في وجنتيها وهي تقول بتكسف وماقدرش أغلط في حد

أنا بحبها قوي ولما يكون معاها بحس إن الدنيا لسه بخير

ست رقيقة عندها إحساس لا تذهب إلى بيوت أبنائها وترفض أن تسبب لهم أدنى إزعاج بوجودها وبتقول:

يا داري يا ستر عاري

أنا في بيتي براحتي ربنا مايحرمش حد من بيته ولا تحوجني يارب لحد

تدعو الله دائما بأن يدخلها الجنه وبتقول ليه:يارب أنا بخاف من النار دي ابعدني عنهاوحياة حبيبك النبي ودخلني الجنه

بتحب مصر لدرجة الجنون وياويله اللي يتكلم عن مصر كلمة واحده قدامها تتنرفز وتبدي غضبها من الكلام :

إيه تقل الدم ده ؟ يقولوا كده عن بلدنا مصر؟ دي أم الدنيا

كفايه كلام كده عن حبيبتي دي لأني مش هبطل وتحتاج في الكتابه عنها لمجلدات

*********************

النموذج السادس

__________


جيران عمتي الطيبة دي

الدور فيه خمس شقق في عمارات بمنطقة رابعة العدوية تطل على نادي الزهور

قضوا حياتهم مرتبطين كالأسرة الواحدة

وفجأة من سنين لا يطرقوا الأبواب على بعض

ولا حتى تهنئة برمضان أو بالعيد

لا يسالوا عنها نهاااااائي

تعجبت واندهشت وسالتها ولم تجد أي إجابة

هما زعلانين منك ؟أبدا يابنتي أنا لا بزعل حد ولا عمري ضايقت إنسان

معقول علشان الست وصلت لمرحلة من العمر أصبحت لا تقوى على تقديم الخدمات لهم يتركوها هكذا ؟

حقيقي مستاءة منهم جدا وزعلانه لأن رسولنا عليه الصلاة والسلام أوصانا بالجيران

تصوروا لا يعرفوا بحالات الوفاة لأبنائها

يغلقوا أبواب سكنهم عليهم كأصحاب أهل الكهف ولا يسألوا عن سيدة مسنة ضعيفة مريضة

اهتموا بجيرانكم وطبقوا وصية الرسول عليه الصلاة والسلام بهم

وربنا يهدي الناس الغريبة دول

************************

النموذج السابع

ــــــــــــــــــــــــــــــــ

تحدثت عنه من قبل وهو البنات المتأخرات في الزواج

رأيتهم كالزهور التي تحتاج للرعاية والإحتواء

يضعوا كل تركيزهم في العلم ليعوضوا به حلم الحب والزواج والأمومة

وصلوا إلى مكانة علمية كبيرة وهي الدكتوراه

أكثر من فتاة رأيتها على ذلك الحال

والنتيجة كما عرضتها في مدونتي للنساء فقط من قبل أنهم لا يرتضوا الإرتباط برجال أقل منهم علميا أو أصحاب حالات إجتماعية مختلفة كالمطلق أو الأرمل وخصوصا لو يوجد لهم أبناء

العلم جعلهم يشعروا أنهم أعلى من أي شاب بسيط وبذلك قضوا على آخر أمل في أن يكونوا أسر ويعيشوا حياتهم بشكل طبيعي

انتبهوا أرجوكم ووازنوا أموركم لأن الستر في منزل به دفء الزوج والأبناء أغلى من شهادات الدنيا مجتمعة

************************

النموذج الثامن

ــــــــــــــــــــــــــــــــــ

سيدة كبيرة في السن جددددا

كانت أستاذة لغة فرنسية منذ زمن بعيد

لازالت آنسة

فيها الكثير من الأمراض وأصعبها النفسي

تتحدث مع نفسها وتكره أن ترى سيدة متزوجه ومعها طفل فتتحدث بفظاظة وغلظة وقلة زوق

تحدثت معها بهدوء ووجدت دموعها تسيل وقالت لو كنت وافقت بالعسكري اللي اتقدم ليا زمان كان بقى ليا بيت وأولاد لكن قلت ازاي مدرسة فرنساوي متعلمة تتزوج من شخص بسيط مثل هذا

ندمانه وتعبانه وللأسف حتى أختها تكره وجودها في زيارة لبيتها لأنها تنظر لأبنائها وتقول ليه أنا مش زيك انتي اتجوزتي وخلفتي وانا لأ؟

تمضي جزء من وقتها جالسه مع زوجة حارس البناية لأنها تخاف من الوحدة

وجعت قلبي عليها ووصيت الحارس يطمئن على أحوالها من وقت للآخر

انتبهوا من تفويت قطارات متعددة حتى لا يأتي يوم لا تجدوا سوى الجدران هي كل ما يحيط بكم وتندموا حين لا ينفع الندم

********************

النموذج التاسع

ـــــــــــــــــــــــــــــــــ

محبي النميمة

قابلت منهم في العزاء كتير

بيتكلموا عن الشخص حتى وهو جالس معهم عن طريق أسلوب الغمز واللمز

بيحشروا أنفسهم فيما ليس لهم

بيتكلموا بغباء شديد ومن وجهة نظرهم هما

هاجمتهم بهدوء واتصدموا من جرأتي

ثقتي في نفسي وتعريتي لعيوبهم فاجئهم وصدمهم

أعوذ بالله من الغيبة والنميمة

شر كبير حذرنا ربنا منه

اتقواالله ولا تنطقوا كلمة إلا بعد أن تفكروا فيها حتى لا نهوى في النار بحصاد ألسنتنا

وبإذن الله سوف أفرد لموضوع الغيبة والنميمة موضوع خاص في مدونة فروا إلى الله لأنها للأسف فاكهة المجالس التي تسمم آخرتنا ونحن مغيبين ولا نهتم إلا بشهوة الحديث فقط

انتبهوا من حصاد ألسنتكم

*********************

النموذج العاشر:

ـــــــــــــــــــــــــــــــــــــ

ده بقى نموذج رهيب مش لاقيه ليه وصف

هو زوح إحدى قريباتي

مشهور بالكذب والنفاق وإنه فشار ومياس وهجاص

كلامه مش بيصفي على أي حاجه ولا أدنى فائدة تذكر

هتكلم براحتي لأنكم لا تعرفوه ويارب ماتكونش غيبة ونميمة

عزموني في منزلهم مع بعض الأقارب

وكانت تاني مره أدخل البيت في خلال أسبوع

كانت بداخلي علامة إستفهام عن سبب وجود صورة حسن نصر الله بوستر مقطوع من مجلة أو جريده ومتعلق على الحيطة

الصورة مستفزة وليس لها مكان من الإعراب

وأصلا تعليق الصور حرام

البيت جميل وراقي ومنظر الصورة يقرف وبيئة قوي

سألته ليه معلق الصورة دي؟

وبعيد عنكم ماسورة 460 مجاري انفجرت وغرقت المكان من حولنا

صوت عالي وانفعال غبي جدا ومالوش لازمة رغم إني سألته بمنتهى الهدوء والبراءة ( كنت لابسه وش العبيط

سب وشتم في المصريين والجيش المصري والحكومة والحاكم لأجل عيون هذا الشيعي النجس

حسن نصر الله بالنسبه ليه جزمته أنضف مننا احنا المصريين بجيشنا المصري

ولما بدأت بالرد اوقفني

مش عايز يسمع غير صوته

وأنا أعترف بحرية الرأي الآخر لكن بالمنطق والعقل والأدب

لقيته بيطنطن بكلمات خايبة وبيشوه صورة مصر بشكل مقزز جدا

أمثال هذا الشخص يتكلموا ويثيروا الشباب اللي قلبه لسه أخضر وبتأثر فيه الكلمات العاطفية بالإضافة إلى طائفة الأغبياء الجهلة ممن هم على شاكلته الذين من الممكن أن يسيروا ورائه ويعملوا بلبلة ومشاكل بلدنا في غنى عنها

بيقول أنا بقول الكلام ده في المسجد وبعلو صوتي

طبعا الحقيقة ممكن تكون العكس لأنه عاشق لإظهار نفسه بطل الأبطال وهو مسكين بمخه

وإن كنت تمنيت له وبمنتهى البراءة برضه إن مايحرموش الحق من ناس تاخده من قفاه وهو عمال يطلع الزباله دي من بقه

ويناقشوه مناقشه بريئة برضه في مكان ما لا أعتقد إنه يعرفه وبداخل هذا المكان يناقشوه ويفهموه إن
مقدرات هذا الوطن مش لعبة ولا لبانه نلوكها بألسننا عن عبط وجهل وغباء

باقي المعزومين شاوروا ليا إني أبطل مناقشه معاه لأن مافيش فايدة حالته ميئوس منها

وأنا برأيي إن حسن نصر الله ماشي من غير الجزمة اللي كان صاحبنا ده بيمجد فيها لأن وبمنتهى البساطه هو شخصيا لابسها في نافوخه

انتبهوا لمن يثير القلاقل ويشوه كل ماهو جميل في بلدنا

إحنا عندنا مشاكل داخلية أيوه

فيه ناس فاسدة وسارقين البلد أكيد طبعا وبيحصل في كل البلاد الأخرى 

لكن بلدنا بلد الأمان ورجالها خير أجناد الأرض

افصلوا بين الغث والسمين وبلاش ننشر الغسيل المتسخ ونقول دي حرية وصراحة ومواجهة

بلدنا زي بيوتنا - يبقى نصلح في بيوتنا ومانقولش للعالم على اللي بيجرى فيها وياريت ندور على عيوبنا ونصلحها ومش كل مصيبة نرميها على المسئولين ونقول إننا مظلومين ونعيش في دور الشهداء
لازم نواجه أنفسنا بعيوبنا ونعمل على إصلاحها حتى تستقيم الحياة وينصلح حالنا وحال مجتمعنا الذين نحن ونحن فقط المكونين له وأيضا نحن من يجب أن يعمل على تحويله إلى مجتمع ناجح ومنتج وصالح تحتذي به المجتمعات الأخرى

****************************************

سامحوني على الإطالة

حفظكم الله ودمتم سالمين

48 comments:

  1. دا احنا لو هنتكلم عن ال10 نماذج
    عايزينك تفتحى مدوناتك كلها على بعض عشان تتحمل

    بس النتيجة اللى طلعت بيها ان فى ناس بسيطة وعايشة الحياة راضية وتقدرى تستفيدى منها رغم قلة الموارد سواء تعليم او غيرة

    وناس كلها غضب ودماغها شغالة 24 ساعة
    ويارتها بتفكر فى حاجة مفيدة تنفعها دنية او اخرة
    مو
    انا اتمنى اعيش برضى وبساطة وفى نفس الوقت اكون بفكر وعايشة حياتى بفيد وبستفيد بعلم وبتعلم
    صعب الجمع بين كل حاجة بس نحاول نكون نموذح كويس على الاقل

    عجبنتى اوى الجملة دى

    مجرد حلم أتمنى أن تحوله بلدي إلى واقع ملموس


    حلمنا كلنا بس تقولى اية مين ينفذ
    دا موضوع محتاج شباب ومخ جبار عشان يطلع بالصورة اللى احنا بنحلم بيها
    وحاليا وفى وسط اللى بيحصل دا مش ممكن


    واخر سطرين اللى بالاحمر دول
    زى ما تكونى كتباهم من قلبى
    حساهم اوى اليومين دول بعد خطاب السيد حسن نصر الله الاخير

    رغم انى ضدد اننا نسئ الية فى كل الاحوال حتى وان اساء هو لينا

    شكرا ليك على مشاركتنا النماذج دى
    تقبلى مرورى

    ReplyDelete
  2. لا يا إحساس الطفولة أنا عرضت 16 نموذج للناس والمواقف مش 10

    والمدونات 13 مش 10

    ربنا يزيد ويبارك ويخليلي المتابعات القمرات اللي زيك

    حاولي تقري الموضوع بمزاج حتى لو على أكتر من مرة وصدقيني هتلاقي فايدة مع كل نقطة أثرتها

    بالنسبة للشيعي المتعفن أسود القلب اللي بتقولي عليه السيد حسن نصر الله - انتي مؤدبة وزوق خالص يا إحساس الطفولة بس خسارة فيه أدبك ده

    ماينفعش يسيء لينا واحنا نتعامل معاه بأدب

    ده مش من الإسلام

    ربنا قال ولكم في القصاص حياة

    الشخص ده بيتعرض لبلدنا بالسوء يبقى ازاي نتكلم عنه بالزوق؟

    دي حتى عمتي الطيبة المتسامحة مش طايقاه نهائي لأنه ضد بلدها

    تعرفي يا نونو أنا ممكن احتمال بعيد قوي يعني أفوت لإنسان يتكلم عني بطريقة سيئة واهو يبقى في ميزان حسناتي لكن يقرب ناحية بلدي أنهشه بلا رحمه

    مرورك بيسعدني وبفرح لما بلاقي شباب صغنتوت زيك عقله كبير بيناقش وبيتحاور

    خالص تحياتي

    ReplyDelete
  3. لا يا إحساس الطفولة أنا عرضت 16 نموذج للناس والمواقف مش 10

    والمدونات 13 مش 10

    قريت البوست كلة بتركيز و طبعا متابعة معاكى
    وعارفة انهم 13 مدونة حتى انا ضيفة منهم 12 لو تفتكرى
    :)
    وعارفة كمان انك عرضتى 10 نماذح
    و6 مشهدات ونصائح شفتيها
    انا بقى كتب بتكلم عن ال10 نماذج لان فيهم كلام كتير

    بس انا علقت على الحاجات اللى حسيت انى عايزة اعلق عليها بس

    فى شباب كتير يا قمر بس نلاقى حد يسمع
    :)
    منتظرة معلوماتك وافكارك وارئك دائما

    تقبلى مرورى تانى

    ReplyDelete
  4. الموضوع اكبر من انى احط تعليق واجرى
    بس لانه موضوع محتاج تحليل ومناقشة كل نموذج على حدا
    ان شاء الله هارجع واعلق وآخد راحتى
    لانى بحب جدا المواضيع اللى فيها تحليل ورؤية شخصية من الكاتب بتعرفنى على دماغه اكتر من المواضيع اللى ممكن تعجبه ويشاركنا فيها

    مصريه البوست ده تفوقتى على نفسك فيه
    بسجل إعجابى ,لكن النقاش ..عاوز وقت
    وده مملكهوش دلوقت
    وانت عارفه الجبارة على وصول
    ربنا يديم عليك الفهم والمعرفه

    ReplyDelete
  5. ياااااه
    كل النماذج دى شوفتيها فى رحلة واحدة
    بجد حاجة توجع القلب
    تفتكرى كل دول ممكن يتغيروا؟
    مش عارفة ليه الاية دى لقيتنى بقولها دلؤتى"يوم نقول لجهنم هل امتلأتى فتقول هل من مزيد"
    ربنا يعافينا يارب ويخرجنا من الدنيا على خير

    ReplyDelete
  6. غاليتي أم البنات

    أنا هترك الموضوع لفترة علشان تمتعيني بردك وتحليلاتك المتعمقة العاقلة

    لا حرمني الله من تواجدك الدائم ومرورك العطر

    في انتظارك

    بوسيلي حبيباتي

    ReplyDelete
  7. حبيبتي في الله التي أحببتها دون أن أراها

    المميزة المبدعة موناليزا

    أقسم بالله يا أختي الفاضلة أني لم أعرض كل النماذج حتى لا أثقل عليكم

    لكن لو تحبوا أكمل الباقي في جزء تاني وأكلمكم عن كل ما قابلته

    لا حرمني الله من اهتمامك بكتاباتي المتواضعة

    خالص مودتي ودعائي لكِ بكل السلامة والصحة وراحة البال

    ReplyDelete
  8. يا خبر يا خبر

    داه بوست لازم يتقسم لكل حاله وكل نقطة ونتكلم واحده واحده

    احنا هنا بنعري مجتمع بطبقاته

    أنا إيماني بالله كبير قوي وعارفه إننا علشان نتغير لازم نكون مؤمنين إننا لازم نتغير

    شايفه بذور خير كتير وبذور شر كتير

    بس مؤمنة بكم من فئة قليلة غلبة فئة كثيرة بإذن الله

    ومننساش شيء مهم الصحابة رضوان الله عليهم انتصروا في بدر وهم ضعاف أذلة

    ربي نصرهم علشان إيمانهم به وبالنصر من عنده

    وفي غزوة حنين انقلبت الصورة المسلمين كانوا مسلحين ومزودين بالخيل والمال والعتاد والأعداد الغفثرة

    لما وثقوا في نفسهم قوي واحتسبوا إن النصر من أنفسهم اتغلبوا

    ربي قادر ينصرنا بعدد قليل

    ويارب يقدر يقويكي بقى وتبدأي بوست جديد بنقطة نقطة ونتجاوب ونناقش

    ReplyDelete
  9. لا لا لا

    ممنوع ممنوع

    مش هسيبك يا حبيبة قلبي إلا لما تنوريني بمناقشاتك الجادة الواعية

    بصي يا ماما نور اللي حصل حالة متكاملة عشتها ذكرت لكم منها أهم ما فيها ولعلمك لسه فيه ملاحظات تانية لكن أنا استبعدتها وكتبت أهمها

    ماكنتش أقدر أتوقف عن الكتابة لأن الإسترسال بيساعدني على تنظيم أفكاري وذكر كل ما أريد التعبير عنه

    إنتي بقى يا قمرايه امسكي نقطه نقطه براحتك وعلقي على أقل من مهلك

    مش هكتب موضوع جديد غير لما نوفي هذا الموضوع حقه وتصل الفائدة كاملة

    دمتي سالمة

    ReplyDelete
  10. صراحة بووووووست توحفة

    ماشاء الله عليكي تحليلك للاشياء و كلامك عنها واخد الفائدة منها

    خلتيني استمتع بالقراءة وزعلت انه البوست خلص

    ومينفعش اساسا اعلق على كلامك انت كفيتي ووفيتي

    بقالي ساعات فاتحة مدونتك وكل ما اجي اعلق يحصل حاجة لغاية ما زهقت وكنت عايزة ادخل انام بس قلبي ما طاوعني وقعدت افكر بالبوست

    عارفة اكتر حاجة وجعتني بجد هي مدرسة الفرنسية

    العنوسة والله صعبة جدا الله لا يحكم فيها على حد

    ياريت البنات ينتبهوا للنقطة دي كويس و لانهم علطول

    مش بيعجبهم العرسان ويعقدوا يطلعوا فيهم الف عيب
    عاوزين رجالة تفصيل

    مش معنى انها جميلة وقمر يبقى خلاص هتكون زوجة مثالية لأ ما في بنات برضوا فيها عيوب بتظهر بعد الجواز

    يعني زي ما هما عاوزين عرسان تفصيل

    الرجالة برضوا عاوزين ست بيت تحافظ عليهم

    الشكل والجمال مش مهم بقدر الاخلاق وحسن التعامل

    ربنا يهديهم

    عنجد استفدت كتير منك وفرحت بكلامك عن عمتك الست الطيبة و كل الستات الجامدة الي صبروا وكافحوا

    ومنتظرين منك الجزء التاني

    عايزين كل حاجة بالتفصيل زي كدا

    ربنا يباركلك ويجعله بميزان حسناتك

    بحبك موووووت

    ReplyDelete
  11. أختي الحبيبة الغالية نوارة

    أسعدني تعليقك جدا لأن واضح إن أنتي كمان قريتي بهدوء وحللتي ماقرأتيه

    والله أنا شفت في الأسبوعين دول حاجات كتير قوي تستحق التوقف عندها

    وزي ماقلتلكم قبل كده إن طبيعة شخصيتي تحليل المواقف والشخوص والحصول على فائدة حتى لو كان التصرف والإنسان الذي أمامي على خطأ

    لعيونك يا ملكة الأناقة والزوق هعرض لكم باقي مشاهداتي بإذن الله ويارب تتحقق الفائدة المرجوة وتسنفيدوا كما استفدت

    دمتي سالمة وبكل خير

    ReplyDelete
  12. مش عارفة اقولك ايه
    المدونة اكتر من رائعة والموضوع دا بجد افادنى كتير
    فى البداية قلت الموضوع طويل ومش هقدر اقراه كله
    لكن لاقيتى بكلمله لاخر كلمة فيه

    الناس اللى اتكلمتى عنهم خاصة عمتك وبنت عمتك ناس نضاف اوى بيور جدا
    مش موجود منهم كتير خاصة فى القاهرة

    نقطة الجواز والشهادات العلمية للبنات عندك حق فيها مليون فى الميه
    ودى موجودة كمان بشكل ابسط فى القاهرة
    يعنى حتى من غير دكتوراه ولا حاجة بس مثلاً البنت اللى دخلت كلية الطب مبتوافقش على حد خريج اداب
    واللى دخلت هندسة مبتوافقش على خريج تجارة
    مع ان الاتنين شهادات جامعية بس هم بيحبسوا الجواز بالمجموع والله تفكير عقيم مش قادرة افهمه

    طب هقولك حاجة تانى
    اعرف واحدة صاحبتى بس فى كلية الطب وفى واحد زميلها فى الجامعة عايز يخطبها
    وهى قالتلى انها مترددة فسألتها ليه
    ردت عليا وقالتلى أصلى بجيت تقديرات بالكلية أكتر منه!!!!!!!!!!

    ReplyDelete
  13. شيء جميل جدا ورائع لما أفتح مدونتي ألاقي قطة دخلت وكتبت لأنها قرأت بتمهل وفهمت واستوعبت

    كلامك مفيد جدا في موضوع ارتباط البنات ومعلومة صديقتك اللي مترددة علشان المجموع تبدو إنها لطيفه وفاني بس هي حاجه مش حلوة خالص لما يكون الإرتباط مبني على قياسات غريبة وواهية

    على فكرة أنا زرت مدوناتك وبصيت بصة سريعه وكمان مدونات اتنين من صديقاتك وعجبوني برضه

    لقيتكم محترمات وعاقلات

    هضيفكم عندي بإذن الله وعند صديقة ليا صممت ليها مدونتها بالأمس

    أتمنى إنك تزوريني كتير وتتناقشي مناقشات فعالة مع ما أكتب

    باربي الجميلة لكِ خالص مودتي و...تحــيــاتــي

    ReplyDelete
  14. بوست جميل
    ونماذج متباينة لافراد الشعب
    وسبحان الله رغم الاختلاف الكبير بين كل نموذج واخر ممكن تلتقى بهم فى فترات متقاربة
    الحقيقة كل حالة عايزة بحث وتحليل
    منهم القدوة الفريدة ومنهم من يجبرك على البعد عنه
    ولكن هذا هو خليط الناس بها الخير والشرير
    الطيب والخبيث
    الجاهل والمثقف
    حمدا لله على سلامة وصولك بعد هذا الجمع الغفير

    ReplyDelete
  15. حبيبتي القدر وأنا

    صدقيني الفترة البسيطة دي شفت نماذج أكتر وهبقى أكتبلكم عنها لاحقا

    وعندك حق فعلا الجمع كان غفير وحسيت إني دخلت صندوق الدنيا لكن استفدت من مشاهداتي الحقيقة

    على الأقل لقيتني راضية عن روحي قوي وبفكر ازاي أبقى أحسن وأفضل وأقرب إلى الله

    نورتيني وأسعدتيني بمرورك العطر

    ReplyDelete
  16. خالتو مصرية حبيبتي قرأت النص الأول من البوست

    وعايزة اقولك بالنسبة للوزن الزائد فأنا بموت نفسي في الدايت دلوقتي علشان اوصل للوزن المثالي بس بجد تعبانه جدا وكتير ارادتي بتنهار وبكتئب لدرجة اني بدعي ربنا سبحانه وتعالى انه يوفقني بس عندي اصرار لأني لما اوصل للوزن المثالي حياتي هتبقى احسن واستايل لبسي هيبقى احلى

    اما بالنسبة للميكروباصات فمعظم الحوادث اللي عملتها كانت بسبب ميكروباص او موتوسيكل ربنا يهديهم

    هرجع تاني واكمل باقي البوست ان شاء الله

    وبالنسبة لمدونتي ف فترة كده وهفتحها تاني ان شاء الله وربنا ميحرمنيش من سؤالك

    ReplyDelete
  17. أهلا بحبيبتي

    ازيك يا ست البنات

    الحمد لله اني اتطمنت عليكي

    بقولك ايه ارجعي بسرعه لمدونتك إياكي تسمحي لحد أو لأي حاجه في الدنيا تتحكم في حياتك بشكل سلبي

    بالنسبة للوزن الزيادة انتبهي وضروري تلتزمي بالريجيم وأنا واثقة فيكي جدا جدا وأكيد مع حلول الشتاء القادم هتكوني تحولتي إلى غصن بان

    خدي بالك من نفسك سواء وانتي سايقة العربيه أو ماشيه على رجليكي

    سائقي الميكروباصات دول لا عقل ولا ضمير ربنا يحمينا ويحفظنا جميعا

    مرورك أسعدني جدا جدا جدا

    ومنتظراكي دايما تنوريني وتفرحيني بتعليقاتك الواعية العاقلة

    بوسيلي ماما وقوليلها تبوسك ليا بوسه كبيرة

    ReplyDelete
  18. مصريه يا حبيبتى
    وجدت انك افضل شئ كما قالت لك نور
    ان تضعى نموذجين او ثلاثه فى تجدوينه ونناقشها
    لان التدوينه ماشائ الله طويله على ما انزل من فوق لتحت هاكون نسيت
    وش مكسوف منك
    بس السن يا جميله نعمل إيه؟

    ReplyDelete
  19. حبيبتي أم البنات

    أولا أنا سعيدة إن الموضوع أثار انتباهك واستفز عقلك

    وحاضر هعمل اللي قلتي عليه طلباتك أوامر يافندم

    ماما نور هتضربني دلوقتي لأني قلتلها مش هكتب عن النماذج دي تاني

    لكن أصل بصراحة شعرت بخجل شديد إني أعيد العرض تاني وكأني من الصحفيين الفظيعين

    لكن حاضر هكتب يا حبيبة قلبي

    بس والله وبعقد الهاء لو مادخلتي وناقشتيني مناقشه موضوعيه اول حاجه لما أجيلك في القاهرة إني أعضك
    (وش بيضحك قوييييي)

    دمتي سالمة بحفظ الرحمن يا أحلى أم بنات

    ReplyDelete
  20. السلام عليكم ورحمة الله وبركاتة
    جميل اوى الامثلة دىوخاصة عمتك
    و الاصيلة
    ومدرسة اللغة الفرنسية
    اما الريفيين
    فمش كلهم طيبيبن
    اما الميكروبصات
    فعندك حق ولا زوق ولا فن ولا حتى اخلاق
    دمتِ بالف خير وود

    ReplyDelete
  21. السلام عليكم

    انا زرت المدنة زى ما وعدتك

    بس للأسف مش عارفة اقرا البوست كويس عندى الظاهر عيب مخلي المدونات تهنج بعد فترة

    هحاول اقرا وإنتظرى منى تعليق تانى

    تحياتى ليكى ومبسوطة من التواصل بينا

    ReplyDelete
  22. حبيبتي أم أجمل سلمى

    نورتيني بإطلالتك الجميلة لمدونتي

    يارب تكوني بخير إنتي وبنوتك

    سعيدة جدا إن الموضوع جذب إنتباهك ويارب تكوني استفدتي من تحليلي وانطباعاتي على ما شاهدته

    دمتي بحفظ الرحمن سالمة

    ReplyDelete
  23. الجميلة إيدي

    أهلا بيكي

    موضوع تهنيج المدونات وضعت ليه حل في مدونتي البيت بيتك وده اللينك بتاعها

    http://mrsegy.blogspot.com/

    يسعدني تواجدك الدائم ومرورك اللي بينورني

    دمتي بحفظ الله سالمة

    ReplyDelete
  24. انا جيت تانى زى ما وعدتك بعد ما قريت البوست

    وبجد متشكرة على اللينك الى حطيتيهولى ان شاء الله استفاد منه

    بجد النماذج اللى وضعتيها فى كتير منها أبكتنى وأثرت فيا اوى

    ربنا يخفف على الناس الوحدة وعقوق الابناء

    لأنهم شئ بشع

    تحياتى ليكى

    ReplyDelete
  25. حبيبتي إيدي

    أهلا بيكي دايما

    سعيدة لاهتمامك بقراءة ما أكتب وأحترم فيكي حفظك للوعد

    أتمنى فعلا تكوني استفدتي وسامحيني إن فيه نماذج أثرت فيكي لدرجة البكاء

    بدعي معاكي إن ربنا يقينا شر الوحدة وشر عقوق الأبناء وجحود الأحباب

    دمتي سالمة بحفظ الرحمن

    ReplyDelete
  26. البلوج هايل
    وسلمت يداكى لعرض هذة النماذج
    عندك حق
    وربنا يتقبل دعائك
    تقبلى مرورى
    ملكة بحجابى

    ReplyDelete
  27. أهلا بالملكة المعتزة بحجابها

    ربنا يبارك فيكي ويسلمك على كلماتك الطيبة

    مرورك أسعدني ويارب فعلا يكون موضوعي أفادك

    دمتي سالمة بحفظ الرحمن

    ReplyDelete
  28. عارفة
    لو قولتلك
    اننا بنتعايش مع النماذج دي يوميا
    بحلوها
    ومرها
    كل يوم
    من الجيرة
    للأهل
    للرحم المقطوع
    بحكم اني عايشة فالريف
    والعقوق
    بدرجات لا تتخيليها

    لكن ربنا يصلح حالنا وحال الجميع
    يارب





    انا ضيفتك عندي وحاولت اهزر معاكي
    بس انتي قفلتي الباب في وشي

    yallah_eman


    انا
    مستنياكي

    ReplyDelete
  29. معقول يا سوبيا

    عقوق في الريف؟

    ده أنا قلت يمكن الريف فيه براءة عن المدينة

    لا حول ولا قوة إلا بالله العلي العظيم

    ربنا يلطف بينا ونرجع تاني لأيام الحب والمودة والخير والبركة

    أنا رجعت أضفتك عندي تاني يا شقية

    واحمدي ربنا إني مش عضيتك يوم لما عاكستيني

    بس خدي بالك إني حسيت إن إنتي؟

    قلت إسمك بس انتي هرجتي وفهمتيني إن مش انتي

    على العموم شوفي بتدخلي امتى وانا أنتظرك

    دمتي بحفظ الرحمن سالمة

    ReplyDelete
  30. ده كان زمان
    زمان اوي كمان
    لاني من ساعة ما اتولدت ما شفتوش بره بيتنا


    ربنا يعافينا


    ما علينا



    انا بدخل من الصبح كده
    يمكن تلاقيني علي فترات متقطعة
    لحد الرابعة عصرا

    مستنياكيييييييييييييييييييييي

    موووااه

    ReplyDelete
  31. حبيبتي سوبيايه

    ربنا يهدينا جميعا ونرجع من تاني زي زمان لما كانت البيوت بتبقى مفتوحه والجيران زي الأهل

    أيام الزمن الجميل

    هحاول أدخل ليكي في مواعيدك دي

    ربنا يخليكي ليا

    بحبك قوي ومواهين مش مواه واحده

    ReplyDelete
  32. حلو كتير البوست...بارك الله فيكي

    ReplyDelete
  33. أهلا ميمي الجميلة

    إيه رأيك بقى إني عرفتك قبل معرفتك بيا لأني لسه ضايفة مدونتك امبارح عندي

    سعيدة لمرورك بمدونتي وأرجو إنك تكرريها

    بالنسبة للمدونة بتاعتك عايزة أزورها على رواقة بقى وافحص مواضيعها بعناية لأني بحب الستات اللي بيهتموا بالمطبخ قوي قوي

    خالص مودتي و ...تحياتي

    ReplyDelete
  34. السلام عليكم
    النمازج دى يجب فعلا ان نتعلم منها
    بس قوليلى يا اختى العزيزه لما الحيل يروح والصحه تبقى على القد هانعمل ايه
    بحاول اعمل صلة الرحم بالتليفون
    واخلى بناتى هما اللى يزوروا الاهل والاقارب بدل منى
    وربنا يديكى الصحه والعافيه

    ReplyDelete
  35. السلام عليكم مسز رايتر

    وحشتينى قوى معلش اعذرينى ماعدتش بدخل كتير على النت

    انتى ازيك و عاملة ايه ؟؟؟

    تعرفى انى لحد دلوقتى ماعرفش اسمك !!!!!!!!! ؟؟؟؟؟

    بالنسبه للبوست عجبنى قوى الحاجه عمتك وطيبتها و كلامها و حسيت حنيتها

    تحياتى

    ReplyDelete
  36. حبيبتي الفراغ

    أهلا بيكي وربنا يديكي الصحة ويشفيكي ويعافيكي

    التليفون بقى وسيلة سريعة للإطمئنان على الأهل والأصدقاء وكويس جدا إنه موجود

    كل علاقاتي مع أهلي بالتليفون لأن أنا صحتي على قدي ومش بقدر أخرج إلا للضرورة

    الحمد لله على اللي باقي من الصحة وربنا يديمها علينا
    نورتيني بمرورك

    ReplyDelete
  37. وعليكم السلام ورحمة الله وبركاته

    إزيك يا زوزو

    وحشتيني ويارب يكون غيابك عن التدوين علشان بتجهزي حاجتك للزواج

    عمتي عجبتك علشان إنتي بنوتة طيوبة

    ربنا يحميكي ويوفقك

    دمتي سالمة بحفظ الرحمن

    ReplyDelete
  38. السلام عليكم
    اختى الحبيبه اشكرك لمشاركتنا لكى رحلتك و الافادة من خبراتك و ما قابلتيه من نماذج و ادعو لمن فسد منهم بان يصلح الرحمن احواله و ان يبارك فى الصالحين و يزيدهم هدى ..
    بوست متميز غاليتى و اسجل اعجابى و احترامى الشديد لعمتك الغاليه و ربنا يبارك فيها و يخليها لكم .. ياارب و ربنا يهدى جيرانها

    دمتى بكل الود و الخير
    ارق تحياتى

    ReplyDelete
  39. وعليكم السلام ورحمة الله وبركاته

    أهلا روفي حبيبتي

    المدونة نورت بمرورك وتعليقك

    وسعيدة إن الموضوع أفادك وعجبك

    ربنا يبارك فيكي على إعجابك بعمتي الحبيبة وهي فعلا تستحق والله دعائك الطيب

    دمتي سالمة بحفظ الرحمن

    ReplyDelete
  40. وحشتينى اوى وقولت ابص عليكى لقيتك ماكتبتيش حاجة جديدة
    ياترى ليه غضبانة على قلمك
    يارب يكون المانع عن الكتابه كل الفترة دى خير
    طمنينى عليكى

    تقبلى مرورى
    ملكة بحجابى

    ReplyDelete
  41. يا حبيبتي يا ملوكة يا جميله

    معقول فيه حد جميل مهتم بيا قوي كده

    كلمة وحشتيني فرحت قلبي قوي

    ربنا يخليكي ليا

    أنا جوايا كلام كتيير ومواضيع كتير عايزة أكلمكم فيها بس الأحداث اللي عماله تحصل ورا بعض مسببه ليا حزن واكتئاب

    بالإضافة إن أنا عندي 12 مدونة غير دي

    بس دي هي الرئيسية اللي بكتب فيها من بنات أفكاري

    الباقيين داخل فيهم مواضيع منقولة للإفادة

    أنا غير متوقفة قوي قوي لكن بنات أفكاري بحسها ماينفعش تطلع إلا وأنا عندي قدرة على إفراغ كل مخزون الإفادة اللي عايزة أوصله ليكم

    بس لعيونك يا قمراية هركز مع بنات أفكاري شوية لأن بجد كده عيب خالص والقلم هو اللي هيغضب مني بالشكل ده

    دمتي سالمة بحفظ الرحمن وفضله

    ReplyDelete
  42. عزيزتي اول مرة ازورك لقيت تدوينة حلوة جدا انت لم تطيلي بالعكس انت عبرتي عن مجتمعنا بعيوبه و مميزاته كأحسن ما يكون اكرمك الله و اوصيك خيرا بعمتك و ان كنت احسبك لا تحتاجين وصية
    و لدي ملحوظة اخري السيدة التي كانت ترافق ابنة عمتك رحمها الله اخشي ان يكون جزء من بكائها علي حالها حيث اصبحت بلا عمل فحاولي دراسة ظروفها ان امكن لعل لديها مشكلة و كانت المرحومة تعطف عليها و تساعدها في حلها

    اما النماذج السيئة فهداهم الله
    ان شاء الله بداية تواصل دائم

    ReplyDelete
  43. أهلا بأم أحمد المصرية الطيوبة

    كلماتك أسعدتني

    وانزعاجك أن تكون السيدة المسكينة تبكي من أجل انقطاع لقمة العيش يدل على طيبة قلبك وحنيتك

    في الواقع يا أم أحمد الست دي كانت بتبكي حزنا على إنسانه ربتها لسنين داخل بيتها ووفاءا لعشرة العمر

    هو ده اللي لفت نظري

    ماكانتش بتتعمد البكاء أمامنا كانت بتبكي لوحدها في صمت

    مع العلم إن أبناء المرحومة مش هيتركوها بالعكس عملها لن ينقطع

    الحجوجه بتاعتنا بقى ربنا يبارك في عمرها وتستحق الحب قوي لأنها عمرها ما أذت إنسان ولا نطقت كلمة غيبة أو نميمة في حق أي شخص

    عايشة لأهلها ولربنا

    ربنا يبارك في صحتها ويمد في عمرها

    تواصلي معاكي شرف ليا يا أم أحمد

    بإذن الله هضيف مدونتك لمدوناتي أصل أنا عندي 12 مدونة غير دي بس دي المدونة الأم اللي بكتب فيها من بنات أفكاري والباقيين ممكن أحط فيهم مواضيع منقولة للإفادة

    عايزة أشوفك دايما لأن زيارتك أكيد هتسعدني

    دمتي سالمة بحفظ الرحمن وأمانه

    ReplyDelete
  44. فعلا نماذج تستحق الاهتمام:)

    ReplyDelete
  45. أهلا يا أقصوصة

    منوراني بزيارتك لمدونتي ويارب دايما ألاقي تعليقاتك هنا

    سعيدة إن موضوعي لفت إنتباهك

    أنا أضفت مدونتك عندي

    بإذن الله أكون من المتابعات لكتاباتك

    دمتي سالمة بحفظ الرحمن وأمانه

    ReplyDelete
  46. اول مرة ادخل عندك
    وبصراحة عجبنى البوست بس بسبب طوله الشديد لم أقرأه كله
    فريته يعنى
    واحلى حاجة عجبتنى فيه الست الارملة اللى ربت عيالها مع انها امية

    ReplyDelete
  47. أهلا باشمهندسة الزوق والشياكة

    على فكرة البنوتة بتاعتي عايزة تطلع مهندسة ديكور وإبني مهتم بأعمال النجارة علشان كده أضفت مدونة سبهللة وباب النجار عندي

    بس ماعرفتش أدخل مدونة أنا وحبيبي

    إبقي شوفيلي حل

    المواضيع بتاعتي بتبقى طويلة لأني بكون عايزة أقول كل اللي بحس إنه هيفيد الناس وبسيب الموضوع فترة طويلة قوي

    تقدري يا رانيا تقسمي قراءته لو مشغولة وماتقدريش تقري مرة واحدة

    أنا سعيدة بزيارتك وهكون من الزائرات المداومات لمدونتك بإذن الله

    ضيفيني عندك وتابعيني

    دمتي سالمة

    ReplyDelete